Našunála giellajahki 2013: NSR háliida bidjat fuomášumi jagi 2013ái mii lea nášunalalaš giellajahki, ja bivdá Sámedikki sihkarastit ahte dát šaddá maid sámi giellajahki gos giellaguovddážat, suohkanat, organisašuvnnat ja institušuvnnat oassálastet.

Sámi e-girje vuoruheapmi: NSR háliida ahte sámegiel girjjit juogaduvvot digitálalaččat ja bivdá Sámedikki ovttasbargat sámi lágádusaiguin guorahallat leago vejolaš sámi e-girjjiid vuoruhit nu ahte sáhttá leat válmmas boahtte jagi bušeahttameannudeapmái.

Sámi bearráigeahčči: NSR evttoha ahte ásahuvvo sámi bearráigeahčči, mii doaibmá bearráigeahččun, bagadallin- ja diehtojuohkinorgánan. Bearráigeahču rolla lea čuovvut mielde movt guovttegielatruđat geavahuvvojit Sámelága njuolggadusaid ektui, ja maiddái dieđuid juohkit sámegiela ja makkár vuoigatvuođat giellageavaheddjiin leat. NSRas lea doaivva ahte dakkár bearráigeahčči boahtá sadjái našunála giellajahkái 2013. Loga eanet dán bearráigeahčču jurdaga birra DÁPPE.

Guorahallat sámi institušuvnnaid giellabálvalusaid: NSR háliida geahččat ahte institušuvnnat mat ruhtaduvvojit Sámedikki bušeahtta bokte fállet doarvái buori giellafálaldaga. Jus galgá sáhttit bidjat doaimmaid johtui sidjiide geat oččot doarjaga háliida NSR guorahallat movt dat institušuvnnat geat ruhtaduvvojit Sámedikki ruđaid bokte, sámegillii doibmet ja fállet bálvalusaid. Movt ja manne jurddahuvvo guorahallat sáhtát lohkat DÁPPE.

Gudnijahttit mánáidgárddeovdagálliid: NSR háliida ahte Sámediggi galgá gudnijahttit álggaheddjiid, eaiggádiid ja bargiid geat ledje daid vuosttaš sámegiel mánáidgárddiid ásaheami duogábealde 1970-logus. Dát mánáidgárddit bidje vuođu dan obbalaš fálaldahkii sámegillii ja kultuvrii, ja bearráigehčče giellaseailluheami ja giellaovdáneami. Sámi mánáidgárddit leat dehálaš báikkit gos giellageavaheaddjit lassánit, ja gudnijahttin lea NSR mielas hui heivvolaš 2013 giellajagis.

Sámegiella ja riektesihkkarastin: NSR háliida sihkkarastit riektesihkkarvuođa sámegielagiidda. Berre geahčadit movt vejolašvuohta lea atnit sámegiela ja movt dat lea čanastuvvon riektevuđđui. Leago vejolaš geavahit sámegiela juohke sajis politiija- ja riektevuogádagas ja man bures politiijaetáhta vuoruha sámegiela- ja kulturmáhtu dego dehálaš máhttun. DÁPPE lea vuđoleabbo ášši birra.

VIVAT sámegillii: NSR háliida VIVAT sámegillii, heivejuvvon kultuvrralaččat ja gielalažžat. VIVAT lea Dearvvašvuođadirektoráhta doaibma mii galgá easttadit iešsorbmema.

Giellahálddašansuohkaniid váikkuhusguorahallan: NSR háliida ahte bidjo johtui váikkuhusguorahallan suohkaniin mat leat siskkobealde sámegiela hálddašanguovllu čuvgendihte movt dát váikkuha eanet go sámegielat bálvalusaide. Dakkár guorahallan sáhttá leat mielde čuvget daid ruđalaš váttisvuođa beliid mat vásihuvvojit go lea giellahálddašansuohkan. Loga DÁS eanet.

Sámi boarrásat galget beassat hupmat gielaset: NSR háliida ahte sámediggeráđđi ságastalla Divttasvuona suohkanin sihkarastit nu ahte sii geat orrot buohcci- ja boarrásiidsiiddas besset gulahallat iežaset eatnigillii maŋŋel go suohkan lea váldán eret giellavirggi institušuvnnas. Loga eanet DÁPPE.

-----------

På norsk / Dárogillii