Sámedikkeáirras Trond Are Anti oaivvilda ahte giellaruđaid ferte eanemusat geavahit nannet ja gáhttet sámegiela. – Sámediggi ruhtada almmolaš sámi institušuvnnaid, ja sámedikkeáirrasin vuorddan ahte sámi institušuvnnat mat ožžot doaibmadoarjaga Sámedikki bokte, hálddašit sámi álbmoga, sihke čálalaččat ja njálmmálaččat, čilge Anti. – Muhtin sámi institušuvnnat mat ožžot ruhtadeami Sámedikkis, dat eai nagot otne addit bálvalusaid sámegillii, ja mii eat sáhte dáinna dillái bisánit nugo dát ášši lea dál. Anti muittuha ahte NSR ja Sámiálbmot bellodat lea gažaldagas sámediggeráđđái áššis 03/12 cuiggodan earet eará ahte Várjjat sámi museas leat váilevaš sámegielat bálvalusat.

Trond Are Anti ja NSR/SfP lea danin evttohan ahte Sámediggi bidjá johtui viiddis guorahallama mii galgá geahččat daid institušuvnnaid maid Sámediggi ruhtada, movt dat čađahit iežaset bálvalusaid sámegillii. Anti sávvá ahte ášši ovdána johtilit ja oaivvilda ahte guorahallan berre leat čađahuvvon ovdal dievasčoahkkima čakčamánus ja ovddiduvvo dievasčoahkkimii dalle. – Dat lea lunddolaš ahte bellodagaid ja organisašuvnnaid miellahtut Sámedikkis besset leat mielde hábmeme guorahallan sisdoalu nu ahte beroškeahttá jođánis guorahallama oažžut viiddis lávdegotti mielde dán prosessii, loahpaha sámedikkeáirras Trond Are Anti.

 ------------

På norsk / Dárogillii