Go jearralan gii lea Ánne Márjá, de vástida ieš oanehaččat ná; Kárášjot nieida, studeanta ja servodatberošteadji. Ánne Márjá lea sámegiela bacheloran lohkamin Romssa Universitehtas, iige loga váttisin beivviid golladit. - Láven eanaš leat skihppáriid fárus. Romssas leat oalle olu fálaldagat maŋŋágaskabeivviid, iige leat váttis fuopmát maid galgat bargat, muitala Ánne Márjá. Lasiha vel ahte muhttomin láve duddjot, muhto dasa ii loga gal leat nu dávjá dilli.

Ánne Márjjá irgi, Thomas Andersen, čohkká ges NSRa nuoraidlávdegottis. Go jearan mo dat ges doaibmá, de čaimmiha ja vástida ahte dat gal doaibmá bures. Láhttesta vel ahte soai gal poletihkkeba fárrolagaid sihke iđitgáfe jugadettiin ja muđuid beivviid miehttá.

Duššivuoddjima vuostá

Ánne Márjjá váimmuášši lea luonddugáhtten. Son háliida ahte mii galgat beassat geavahit luonddu. - Mun háliidan ahte mii galgat sáhttit geavahit luonddu, in ge hálit ahte mii galgat bilidit iežamet luonddu, nu mo čáhceskohteriiguin ja menddo olu vuoddjit dábálaš skohteriiguin. Lean vuostá duššivuoddjima. Lean maid hui vuosttá suodjalusa báhččinguovlluid, maid dál vuot áigot viiddidit dáppe Davvi-Norggas. Dat lea hui dehálaš munnje, dadjá Ánne Márjá čielgasit.

Oahppat sápmelaččaid birra

Nubbi ášši mii Ánne Márjái lea dehálaš, lea ahte daža servodagas ja earenoamášit skuvllain Norggas galget oahppat sápmelaččaid birra. - Sii galggašedje oahppat mo mis duođaid lea Sámis. Iige nu mo otne lea dilli, ahte servodatoahppogirjjis čuožžu dušše moadde cealkaga sápmelaččaid birra, dadjá Ánne Márjá.

Vuordámušat stivrra bargguide

Ánne Márjá illuda hirbmasit bargagoahttit stivrras. - Lean hui speanta mo šaddá bargat riikkastivrras. Sávan ahte beasan ollu nuoraiguin oahppásmuvvat ja ahte beasan nuoraid ovddas bargat. Sávvamis mun olahan áššiiguin main mun beroštan, nu ahte dat gullojit servodagas ja earát maid fuomášit daid dehálaš áššiid.

Nuoraid fitnet fárrui

Ánne Márjá maid muitala ahte son háliidivčče eanet nuoraid fitnet fárrui. - In leat vel háhppehan nu olu smiehttat mo dan galggašii dahkat, muhto mun lean ollu smiehttan manin nuorat eai soaitte beroštit. Mun jáhkan ahte ovddamearkka dihtii nuorain Kárášjogas leamašan menddo buorre dilli. Dat lea váttisvuohta. Muhto dieđusge ii leat gal čoavddus dagahit nuoraide vearrát dili, čaimmiha Ánne Márjá. Son dáhttu baicce earáláhkai fuomášuhttit sidjiide man dehálaš lea beroštit servodatáššiin, muhto ferte dušše vuos eambbo jurddašit das ahte mo dan galggašii nágodit.

Manin válljejit justa NSRii searvat?

- Oi. Diet lei váttes gažaldat. Na danin go dat lea buoremus searvi, mii heive buot sápmelaččaide olles Norggas. Mun dovddan iežan hui bures boahttin NSRii. Eará dehálaš ágga munnje lei ahte NSR ii leat dáža bellodat. Loahpas vel danne go NSR ii leat dušše politihkka muhto maiddái kultuvra. Kultuvra bealli soaitá munnje vel deháleabbot go ieš dat politihkka, vástida Ánne Márjá.

Mii sávvat sutnje lihkku ođđa doaimmain riikkastivrras!