Riikkačoahkkincealkámuš 2007 - Sámi vuoigatvuođalávdegoddi 2 ja eatnan- ja čáhcevuoigatvuođat olggobealde Finnmárkku
Sámi vuoigatvuođalávdegoddi II gárvvista čielggadusas čakčat 2007. Norgga Sámiid Riikkastivrra (NSR) jahkečoahkkin háliida áššálaš ja vuđolaš dieđuid nuppi Sámi vuoigatvuođalávdegotti evttohusa ja faktavuođu birra.

Háliida áššálaš ságastallama
NSR riikkačoahkkin ávžžuha čalmmustit áššálaš ákkaid ja háliida konstruktiivvalaš ságastallama. NSR riikkačoahkkin ávžžuha Sámedikki, fylkkasuohkaniid ja suohkaniid veahkkin loktet máhtolašvuođa ja áššálaš ságastallama, ja NSR báikkálaš searvvit háliidit maid dasa searvat.

Vuoigatvuođat ja hálddašanmodeallat
Dás lea sáhka sihke vuoigatvuođain ja makkár modeallaid mielde eatnamat ja čázit galget hálddašuvvot. Jos maŋŋá galgá čielggadit vuoigatvuođaid, de ii leat sáhka ođđa vuoigatvuođaid ásaheames, muhto dohkkeheames daid vuoigatvuođaid mat sámiin leat. Dát leat váttis gažaldagaid, ja jos daid galgá ságastallat, de ferte leat máhtolašvuohta.

Oktasaš beroštumit
Dieđusge leat máŋga oainnu dasa makkár modeallaid galgá geavahit, ja mii fertet almmolasvuođas ságastallat guovtteoaivilvuođaid birra. Muhto, mii háliidit váruhit sámi – dáru polariserema vuostá mii orru leamen šaddamin. Jos polarisere, de ii boađe ovdan ahte buohkaide lea ávkkálaš čielggadit vuoigatvuođa- ja hálddašangažaldagaid.

NSR oaivvilda ahte ferte geavahit seammá vuoigatvuođalaš- ja hálddahuslaš prinsihpaid olggobealde Finnmárkkus go Finnmárkkuláhkabarggus.

Loga cealkámuša dárogillii