NSR áigu dákko bokte čájehit iežas doarjaga Rom-álbmogii. Geasi dáhpáhusat ja divaštallamat Norggas leat ožžon min reageret garrasit. Norggas lea olmmošvuoigatvuođa suddjejeaddjin, ja iežas riikkaidgaskasaš beroštumi geažil dán suorggis, erenoamáš ovddasvástádus leat njunnožis bargat dáid gažaldagaiguin mat gullet Rom-álbmogii Norggas ja Eurohpás, ja NSR áinnas háliida oaidnit dakkár aktiiva politihka ja dagu.  Buot olbmot galggaše reageret láhttenmeanuide maid Rom-álbmot gillá.

Lea dárbu bargat servodagas ovdánahttime reaidduid nu ahte mii nagodit dán dili fuolahit buoret lági mielde go dan maid dán geasi leat oaidnán. Jus ii dahkkojuvvo, de boahtá dát dáhpáhuvvat fasttain ja fasttain, ja darvánit ovtta sadjái eat ge beasa viidáset.

Vuosttažettiin NSR oaivvilda ahte Rom-álbmogis lea riekti defineret sin iežaset kultuvrra, giela ja eallinvuogi. Nubbi lea ahte buot olbmuin leat individuálalaš vuoigatvuođat. Ođđaáigásaš servodat galgá sáhttit váldit dán vuhtii.

Norgga servodagas, maiddái sámi servodagas, lea morálalaš geatnegasvuohta čájehit oktiigullevašvuođa Rom-álbmogiin mii vásiha ollu dain seamma vuolitvuođamearkkain go maid sámit leat vásihan Norggas dáruiduhttinproseassa oktavuođas. Sámit leat vásihan ahte sin dilli lea buorránan riikkas ovdáneami ja institušonaliserema bokte, riikkaidgaskasaš riekteovdáneami, našunála láhkaovdáneami ja vuoigatvuođaid bokte, ja oaivvildit danin ahte dat addá maiddái sámiide ovddasvástádusa joavkkuide mat leat hearkkes dilis.

Kárášjohka 16.9.2012

Les på norsk her / Loga dárugillii dás