-       Viimmat oaidnit bohtosiid maŋŋel go leat 20 jagi rahččan oidnosinbidjat sámi báikenamaid Skántihis, dadja Ann-Mari Thomassen. Borgemánu 8.beaivve 2011 lea historjjálaš mearkabeaivi buohkaide geat leat bargan sámi báikenamaid dihte guovllus.

Iinná ja biras sámiid searvi jođiheaddji ja sámedikkeáirraš Ann-Mari Thomassen illudii oktan Várdobáiki sámi guovddaža stivrajođihedjiin, Olav Andersen, go Stáhta luoddadoaimmahat  ceggii vuosttaš sámi galbbaid Hoantta – Nipen ja Vuopmegeaži - Trøssemark gilažiidda.

Ann-Mari Thomassen ja Olav Andersen muitiba bures cealkamuša maid miellahttučoahkkin Sáttidvuomis – Sandmark sáddii Skánihii, Evenáššai ja Tjeldsun suohkaniidda 1991:as, máŋŋelgo Báikenammaláhka álggahuvvui. IBSS gáibida ovttadássásaš sámegielat ja dárogielat báikenamaid ja oidnosindahkkat galbbaide ja kártaide. Lea leamaš ádjas proseassa, muhto bohtosiid oaččut dál, dadja IBSS jođiheaddji ja sámedikkeáirras Ann-Mari Thomassen. –Dál vuordit eanet sámegielat galbbaid, maiddái čoahkkebáikiin gos leat eambbo olbmot nugo Evenášši ja Grov nammasaš báikit Skániit suohkanis.

Várdobáikki stivrajođiheaddji, Olav Andersen, muitala ahte Várdobáiki báikenammalávdegoddi lea sádden evttohusaid eanet sámegielat báikenamaid olles guovlui. Várdobáiki báikenammalávdegottis lea dárbbašlaš gelbbolašvuohta maid suohkan gáibida báikenamma-áššái.

--------

På norsk / Dárogillii