IBSS-NSR váidálus Áhkkarnjárgga/Narvik gávpotstivrra mearrádusa ja gáibida čuovvoleami Báikenamalágas 1990/91:is

Iinna ja Biras Sámiid Searvi-NSR váidala Narvika gávpotstivrra mearrádusa sámi báikenamaid áššis ja bivda kultuvraministara Anniken Huitfeldta čielggadit vieruid ja láhkavuođu hálddašeamis báikenamalága. IBSS háliida diehtit sirre go ministtar gaskal váldit atnui sámi báikenamaid ja vuođđudit čállinvuogi sámi báikenamain.

IBSS sihtta čielggadit leago gávpotstivrras láhkavuođul lohpi dahkat mearrádusa mas dadjet Narvik lea ovttagielalaš ja dan vuođul mearrádusa ahte sámegielat namma Narvikas ii galgga váldot atnui, seammas čielggadit leago Narvik gávpotstivra lága čuvvon go lea hilgon dáid sámi báikenamaid Ušmá (Beisfjord), Čoalbmi (Fagernes), Rahkka (Bjerkvik), ja Áhkkanjárga (Narvik).

IBSS lea 1980-logu rájes bargan oččodit sámi báikenamaid almmolašvuođa ovdan dán guovllus ja lea 1991 rájes bargan oččodit suohkana buohtalastit sámi báikenamaid galbbaide, Báikenamalága 1990/91:ii mielde. IBSS ii leat duhtavaš go suohkan mas lea sámi álbmot lea badjel 20 jagi máŋŋel go Báikenammaláhka álggahuvvui, eai leat vel vuhtiváldan ja positiivva mearrádusa dahkan nu ahte sámi báikenamat oidnosindahkkojuvvojit nugo livčči lága áigumuš ja ulbmil.

IBSS čujuha Narvik gávpotstivrra meannudeami ja bissovaš mearrádusa áššis 056/11 gos Narvik gávpotstivra ii mearrit ollislaš positiivalaš mearrádusa sámi báikenamaid hárrái. Sámi báikenamat mat meannuduvvoje áššis ledje evttohusat hálddhusa bealis ja ledje:

Čoahkkebáikit ja gilažat: Beisfjord: Ušmá, Fagernes: Čoalbmi, Bjerkvik: Rahkka, Vassdalen: Áravuopmi, Kvanndalen: Luotnegohpi. Luottat ja čujuhusnamat: Vassdalsveien: Áravuomebálggis, Sørsidveien: Dobealebálggis, Elvemo: Bávttevuolbálggis, Kvanndalveien: Gobebálggis. IBSS lea diehttelas ilus go Narvik gávpotstivra lea mearridán čállit Áravuopmi ja Luotnegohpi ja luodda- ja čujuhusnamaid nugo hálddahus lei evttohan máŋŋel nammakonsuleantta ráđđaheami. Dat mii guoská Narvik, celkki hálddahus: ”Narvika gávpotnama bealis de boahtá láhkaásahus báikanamaid čállinvuogi birra § 6 atnui. Namma Narvik lea ovttagielat ja Narvik suohkan mearrida ahte almmolaš čállinvuohki lea Narvik sihke dárogillii ja sámegillii.”

IBSS dulko Báikenammalága systema lea huksejuvvon nu ahte jus sámegielat báikenamat geavahuvvojit olbmuid gaskas báikkis, ja čállinvuohki lea lágas bidjon, galga namma geavahuvvot almmolaš kártain, galbbain, registeriin ja nu ain, oktan vejolaš dárogiel namain. IBSS čujuha Várdobáiki sámiguovddažii, mii lea guovllus, lea ásahan báikenamalávdegotti mas lea formealla gelbbolašvuohta sámegilli ja sámi báikenamaid birra guovllus. Báikenammalávdegoddi lea evttohan Áhkkanjárga mii galgá leat ovttadássásaš dárogiel nammi Narvik. Maiddái NSR riikačoahkkin čakčamánu 3.-5.beaivve 2010:is ja IBSS jahkkečoahkkin cuoŋumánu 14.beaivvi 2010 evttohii Áhkkanjárga namman ovttadássásasaččan Narvik namain, Báikenammalága § 3 mielde gos čuočču: Doppe gos báikenamat leat beaivvalaččat geavaheamis báiki olbmuin galget maiddái atnot almmolaš oktavuođas, galbbain, kárttain ja registeriin. Sámi báikenamat leat beaivvalaččat geavaheamis sámegielat álbmogis guovllus. Narvik gávpotstivra galggašii višuvdnan atnit baicce eambbosiidda addit vejolašvuođa geavahit sámegielnama Áhkkanjárga beaivvalaččat, nugo čalmmustahttin nama galbbaid bokte adda dakkáraš vejolašvuođa.

IBSS oaivvilda Áhkkanjárga/ Narvik gávpotstivra ii leat čuvvon láhkamearrádusa go ii leat viežžan gulaskuddancealkamušaid báikkálaš instansain, nugo ovdamearkadihte sámeservviin ja Várdobáikki báikenamalávdegottis ovdalgo ášši bidjui gávpotstivrra ovdii. Áhkkanjárga/Narvik suohkan lea máŋŋel sádden dieđu, beaivvi 03.08.11, gos bovdejit min buktit váidaleami suohkanii. Min reivve lea dan dihte maiddái váidaleapmi Áhkkanjárgga/Narvik suohkanii.

Oktavuođaolmmoš:

Ann-Mari Thomassen

9445 Duviika/Tovik

Mobiila nummr: 90057123

-----------

Loga olles reivve maid IBSS sáddi dás

Loga Narvika gávpotstivrra áššemeannudeami dás

----------

På norsk / Dárogillii