Eanandoalo- ja biepmodepartameanta (EBD) evttohii ikte preassadieđahusas biđget boazodoalohálddahusa, ja bidjat guovllukantuvrraid filkkamánniid vuollái. NSR lea moaitá dán evttohusa, ja sihtta árvvošstallat galggaši go Sámediggi váldit badjelasas boazodoalu hálddašeami.

– Leago boazodollui buorrin hádjet fágabirrasiid dáinna lágin? jearra NSR-jođiheaddji Aili Keskitalo. – Boazodoallu vásiha stuora hástalusaid dál, earenoamažit billistemiid ja arealaid hárrai. – Movt galgat dákkáraš čovdosiin sihkarastit ollislaš ja ovttalágan hálddašeami deaŧalaš álgoálbmot ealáhusa.

Sámidiggi evttohii 2007s juo, dalle go Boazodoaloláhka dárkkistuvvui, ahte Sámedikke rolla galggái árvvoštallojuvvot go boazodoallohálddašeapmi rievdaduvvui. Sámediggi háliidii lávdegotti mas oasseváldit bohte EBD, boazodoallohálddahusas, NRLas ja Sámedikkis árvvošstallandihte álbmotrievttiid, prinsihpalaš ja práktihkalaš beliid boahtteáiggi boazodoalohálddahusa. Eanandoalodepartamenta ii leat dađi bahabut dán váldan vuhtii. Skábmamánu 2010 biehttalii sámedikkeráđđi Ellinor Marita Jåma bokte ahte Sámediggi lei dieđihuvvon dahje lei mielde dákkáraš rievdadeamis.

– Movt sáhtta EBD ovddidit dakkár evttohusa Sámedikki dieđitkeahtta, jearrá Aili Keskitalo viidaseabbo. – Ja manin ii leat sámedikkeráđđi sihkarastan čáđaheami dan prosessa maid Sámediggii evttohii 2007as, ja maiddái dohkkehii Sámedikke boazodoalodieđahusas 2009is.

Eanandoalo- ja biepmodepartameanta preassadieđahus

----------

På norsk / darogillii