Vuođđun rápportii lea Anaya galledeapmi Sápmái ja deaivvadeapmi davvi riikkaid sámedikki ovddasteddjiiguin, davvi riikkaid eiseválddiiguin, sámi organisašuvnnaiguin, ásahusaiguin ja eaŋkil olbmuiguin cuoŋumánus 2010is. Dát lea erenomaš gelddolaš go dát lea vuosttaš háve go ON almmolaččat galleda álbmoga mii ássá ja gean árbevirolaš eatnamat lea ásahuvvon eanet riikkarájáid rástá. Sápmelaččaid dilli ruošša beal Sámis dahe bahábut ii gokčojuvvo dán rápportas.

Anaya rápporta nanne ahte sápmelaččaid olmmošvuoigatvuođadilli lea sakka buorit go máŋga eará eamiálbmogiid dilli lea, muhto son buktá lihkkáge konkrehta ávžžuhusaid davvi riika stáhtaide mo ain sáhtášedje nannet sámi vuoigatvuođaid ja iešmearrideami álbmogin. – NSR giitá Anaya go čalmmástuhttá sámi álbmoga áigeguovdilis hástalusaid, lohká Geir Tommy Pedersen, NSR doaibmi parlamentáralaš jođiheaddji. – Anaya rápporta guoskkaha dehálaš sámi áššiid, muhtun mainna NSR ja Sámediggi lea máŋggaid jagi bargan, nu go sámi guolástusvuoigatvuođaid, eana- ja resursavuoigatvuođaid. Mii doaivut dát rápporta, maid mii oaivvildat nanne ja duođašta min ákkastallan, buvtteha ahte ráđđehus čájeha dáhtu buorit čovdosiid gávdnat.

Mannan giđa Roavvenjárggas Anaya deaivvadettiin, NSR válljii loktet sámi mánáid vuoigatvuođaid dehálaš hástalussan. – Mii diehtit ahte sámi mánáid vuoigatvuohta sámegillii ja oahpahussii dávjá ii ollašuvvo, ja mii leat vuorjašuvvan sámi mánáid vuoigatvuođaid hárrái go lea dárbbu almmolaš veahkkái, nu go mánáidsuodjalusas, joatká Pedersen.

NSR oaivvilda Anaya rápporta maid hástala Sámedikkiid dohppet hástalusaid mat eai leat čovdojuvvon. – Anaya lokte nuortasápmelaččaid rašis dili, ja čujuha dasa ahte Norga lea geažuhan ahte dáinna áigut bargagoahtit. Mii muittuhit ahte Sámediggi maid lea čujuhan dása Finnmárkolága mearrádusas 2005as, lasiha Pedersen. – Dás lea Norgga Sámediggi leamaš hui passiivva, ja dán rápporta ferte dulkot muittuhussan alccemet.

----------

På norsk / darogilli