Norgga Sámiid Riikkasearvvi jođiheaddjin lea gudni boahtit deike dearvvahit Oslo sámiid searvi - NSR ja sávvat lihku 60 jagi ávvudemiin. Dehálaš ja virkos ávvudeaddji lea odne ávvudeamen.
Váldit vára gilas ja kultuvrras
Lea erenoamáš leahkit dáppe dan oktavuođas. Oslo Sámiid Searvi han lea min boarráseamos searvi – dat vuođđuduvvui Oslos guovvamánus 1948. Duogábealde dan ledje sápmelaš studeanttat ja sámenuorat Oslos. Sin váldojurdda ledje váldit vára min divrras sámegielas ja kultuvrras. Vuosttas jagit lei váttis doalahit searvi badjin, muhto easkka maŋŋil han manai buorebut. Searvi searvvai Norgga Sámiid Riikasearvái go dat vuođđuduvvui.
Ollu politihkkarat geat ledje mielde vuođđudeamen Oslo Sámiid Searvi, maŋŋil válde ain eanet ovddasvástádusa ja serve mielde NSRii ja bargagohte olles sámeálbmoga ovddas. Oktan mu stuorámus ovdagovaid – nammalassi Jovnna Ovllá Hánsá – guhte lea dáppe odne - ja eará akademihkkarat ja servvodatberošteaddjit nu go ovdamearkka dihte Thor Frette, Hjalmar Pavel ja Reidar Hirsti ledje aktiiva go sámiid searvi dáppe Oslos ásahuvvui.
Mun dieđán ahte leat buotlágan áššit mat leat leamaš guovddažis Oslo sámiid searvvi álggu rájes – ovdamearkka dihte lei ovtta fáddá man dehálaš dat duođaid leai ahte olbmot bussejedje bániid ja eará servodat bajásčuvgehus áššit. Lea dieđusge hui ollu áššit mas lea leamas dehálačča - ja giella- ja kulturbargu lea álo leamas hui dehálaš máŋgasiidda dáppe. Ja dat han lea maiddái álo leamaš guovddážis NSR barggus.
Stuorra ávkin maiddái boahtteáiggis
Min servvodatdigaštallamis lea dál leamaš ollu sáhka sápmelaččain geat fárrehit gávpogiidda. Mu mielas lea hui erenoamáš jurddašit dan birra ahte jus ii livččii leamas Oslo Sámiid searvi dalle dolin ja nanus “gávpot-sápmelaččat”, de varra ii livččii NSR ge šaddan. Ja movt livččii min dálá sámi servodat leamaš jus ii livččii leamaš guovddáš ja dehálaš bargu maid earret eará Oslo sámiid searvi leat dahkan? Mun ferten atnit árvvus min máttuid geat fárrejedje gávpogiidda earret eará dan dihte go válde alla oahpu dáppe stuorra gávpogis. Mun dieđán ahte sihke dálá ja boahttevaš sámi buolvvat ožžot stuorra ávkki dan barggus maid earret eará Oslo Sámiid searvi lea bargan.
Sámi deaivvadanbáikkit dehálaččat
Munnje lea maid dehálaš erenoamážit namuhit daid geat barget sihke kurssaiguin, giellabargguin ja kulturbargguin nu go Dálvefestivála dáppe Oslos. NSR jođiheaddjin áiggun giitti čeahpes miellahtuid ja álggaheddjiid geat leat bargan máŋga máŋga diimmu eaktodáhtolaččat searvvi ovddas ja sámi servodaga ovddas. Dákkár sámi deaivvadanbáikkit leat mu mielas hui dehálaččat.
Bargat ovttas
Dál leat máŋga olbmo dáppe dán guovllus geat barget NSR ovddas. Dál sáhtášin ja berrešin namuhit ja gudnejahttit máŋga resursaolbmuid, muhto buot deháleamos lea aŋkke oktasaš bargu maid sámiid searvi leat bargan ja mii lea duođaid ovddida sámi áššiid. Mis lea buohkain hui dehálaš rolla dan barggus. Mun sávan ahte dát searvi galgá leat deaivvadanbáiki kulturbargiide ja politihkalaš njunnošiidda nu go álo lea leamas 60 jagi čađa. Go mii buohkat bargat ovttas dál ja boahtteáiggis – dalle mii šaddat stuoribut go mii ieža.
Ain leat hástalusat vuordimin
Mis leat ain máŋga oktasaš hástalusa maiguin mii fertet bargat. Muhto mun gal lean áibbas sihkar ahte sámekultuvra eallá jos mis ain leat čielga ofelaččat nu go Oslo sámiid searvi boahtteáiggis. Danne lean hui rámis ja ilus – ja sávan searvái hui ollu lihkku 60 jagiin. NSR illuda boahtte guhttalogi jagis ovttasbargat dinguin, sihkkarastit sámi kultuvrra, sámegiela ja sámi servodaga.
Hui ollu lihkku didjiide!
Denne artikkelen på norsk
Kommenter denne artikkelen
Tips en venn Gå tilbake