Sámedikki dievasčoahkkin Kárášjogas meannudii árabut dán váhkos movt sámi mánáid vuoigatvuođaid ja riektesihkarvuođa galggašii vuhtii váldit prošeavttas Mánáid Viessu. Mánáid Viessu lea ođđa gažadanvuohki man mielde galgá gažadit mánáid ja nuoraid geat leat seksuálalaččat illástuvvon, cápmáhallan dahje šaddan oaidnit go nubbi olmmoš bearrašis cápmáhallá. Mánáid Viessu galgá leat dakkár báiki gosa čohkkejuvvo veahkki daidda mánáide geat leat illástuvvon ja cápmáhallon, ja sin bearrašiidda. Buot gelbbolašvuohta galgá čohkkejuvvot ovtta sadjái.
Psykologat ja politiija sámevuođa dovdat
- Veahkkeapparáhtta ferte máhttit váldit vuostá ja veahkehit sámi mánáid geat leat roasuid siste, ja sin bearrašiid, seammá bures go earáid. Mánát ja bearrašat galget beassat sámegillii gulahallat vehkiiguin geain lea sámi kulturipmárdus. Ovdamearkka dihte berrejit psykologat ja politiijat máhttit sámegiela ja dovdat sámi kultuvrra, celkkii sámediggeáirras Rita-Alise Porsanger (NSR).
Stuorra váikkuhusat
Dál čállet psykologat, geat eai máhte sámegiela, raporttaid main lea ollu dadjamuš riektevuogádagas. Politiijat, geat eai máhte sámegiela, gažadit mánáid cábmin- ja illástanáššiin. – Dáinna lágiin sáhttet šaddat boasttuáddejumit ja stuorra váikkuhusat oktonas olbmui. Dáinna lágiin ii sáhte leat, celkkii Porsanger.
Čiegusášši
Rita-Alise Porsanger čujuhii maiddái dasa go sámi servodagas eai arvva hállat veahkaválddi ja illástemiid birra. Bearrašat ja fierpmádagat leat giddalagaid ja mánáide ja bearrašiidda šaddá váttis ja veahkkeapparáhttii maid šaddá váttis.
Fáktenbargu
- Dán áššis oaidná hui čielgasit movt eiseválddit vajáldahttet sámi perspektiivva go plánejit ođđa dehálaš ásahusaid. Min bargu lea čujuhit sámi mánáid vuoigatvuođaide ja fáktet ahte eiseválddit čuvvot riikkaidgaskasaš konvenšuvnnaid ja lágaid, jotkkii Porsanger.
Hoahppoášši
Eat mii velge dieđe movt sámi perspektiiva vuhtii váldojuvvo go Mánáid Viessu prošeakta álggahuvvo čakčat, šuohkká Porsanger, ja muittuha ahte dát leat hoahppoášši. Sámi perspektiiva galggašii leat sajis dan beaivvi rájes juo go Romssa politimeašttir almmolaččat rahpá Mánáid Viesu Romssas.
Denne artikkelen på norsk
Kommenter denne artikkelen
Tips en venn Gå tilbake