Stáhta geaidnodoaimmahat dulko Báikenammalága 1990 guovtti láhkái, siskkobealde sámi giellahálddašanguovllu ja olggobealde giellahálddašanguovllu. Nu boahtá ovdan reivves maid Stáhta geaidnodoaimmahat lea sádden Skániid suohkanii 25.04.08. Reivves čállá Stáhta geaidnodoaimmahat ahte eai geavat guovttegielat galbbaid go lea sáhka čujuhangalbbain.
Imaš láhkalohkan
Norgga Sámiid Riikkasearvvi (NSR) sámediggejoavku jearrá lea go lohpi dán láhkái dulkot lága. Báikenammaláhka, nu movt mii lohkat dan, ii atte makkárge vejolašvuođa earuhit galbema giellahálddašanguovllus ja giellahálddašanguovllu olggobealde, nanne Thomassen.
Sámit unnitlogus
Mu mielas galgá loktet sámegiela oidnosii geaidnogalbbain buot suohkaniin gos ásset sápmelaččat. Nu han čuožžu lágas. Sámi guovlluin gos sámit leat unnitlogus, de lea dehálaš ahte sápmelašvuohta lea oidnosis almmolašvuođas. Sámi báikenamat kárttain ja galbbain lea buorre vuohki movt sámegiela loktet oidnosii, oaivvilda Thomassen.
Ođđa ášši lokten
NSR sámediggejoavku ovddidii dán ášši ođđa áššin Sámedikkis, ja bivdá Sámedikki čujuhit Stáhta geaidnodoaimmahahkii ahte Báikenammaláhka ii atte vejolašvuođa guovtti láhkái dulkot lága, giellahálddašanguovllus ja olggobealde giellahálddašanguovllu.
Denne artikkelen på norsk
Kommenter denne artikkelen
Tips en venn Gå tilbake