NSR sámediggejoavku oktan ovttasbargoguimmiiguin nagodii oažžut eambbo ruđa sámi váldoorganisašuvnnaide, Sámedikki bušeahtas. NSR lea ovttasbargan nuppiid organisašuvnnaiguin ja singuin ovttas gáibidan eambbo ruđa sámi váldoorganisašuvnnaide.

Viimmat doarjja lasihuvvo

NSR oaččui 1 400 000 ruvnnu boahtte doaibmajahkái. NSRs lea ain dárbu lasihit ruđaid sámi váldoorganisašuvnnaide, ja maiddái addit ruđa ollu eará sámi organisašuvnnaide vai sii maid sáhttet doaibmat. – Sámi váldoorganisašuvnnat leat dehálaččat sámi demokratiijas, cealká Muotka.

Sámediggi juolluda organisašuvdnadoarjaga daidda sámi váldoorganisašuvnnaide geain leat eambbo go 500 miellahtu ja leat sádden ohcamuša, jahkedieđáhusa, rehketdoalu ja rehketdoalli dárkkistuvvon miellahttologu. Sámi duodje-, dáiddár- ja ealáhusorganisašuvnnat maid ožžod doarjaga sámedikkis, ja 2008 rájes oažžu Sámi álbmotbellodat maid doarjaga.

Oskkáldas miellahtut

Oktiibuot 24 sámesearvvi Norggas gullet NSRii- Miellahttulohku lea gaskal 800 – 1200 miellahtut. – Norgga Sámiid Riikkasearvvi (NSR) miellahttolohku lassána ovdalaš válgga danne go olbmot ealáskit, ja unno maŋŋá válgga, muitala Muotka.

- Miellahttolohku ii leat dán háve njiedjan nu ollu go ovdal. Mii han diehtit ahte buot eaktodáhtolaš organisašuvnnain lea váttis gávdnat olbmuid danne go buohkain lea hoahppu árgabeaivvis. Sámesearvvit leat duođaid bargan buori barggu ja čohkken miellahttomávssuid. Mun lean hui giitevaš sámesearvvi bargguid ovddas, rámida duhtavaš Muotka.

Ávvudančoahkkima plánemin

Norgga Sámiid Riikkasearvi (NSR) čállingottis Guovdageainnus bargá Thomas E. Myrnes Nygård Narviikkas/Evenáššis eret. Son lea juohke beaivvi kantuvrras, earret gaskavahkuid. Čállingoddi ja riikkastivra leat plánemin ávvudančoahkkima mii galgá leat ođđa hoteallas Guovdageainnus golggotmánu 24. – 26. beivviid 2008. Mii illudit ávvudit NSR 40-jagi beaivvi, cealká Silje Karine Muotka.

Mis leat buorit čovdosat

- Mii galgat ávvudit ja muittašit pioneraid geat álggahedje organisašuvnna oalle váttis politihkalaš áiggis.

Norgga ráđđehusat leat vuoruid mielde fievrridan politihka mii lea bággen olbmuid fárret gávpogiidda ja guođđit báikegottiid.
- NSR lea bargan vuostá ja evttohan čovdosiid mat dahket ahte buot Davvi-Norgga olbmot galget sáhttet ássát iežaset ruovttubáikkis jos dan háliidit. Vaikko sámi vuoigatvuođat leamaš vuođđun, de lea organisašuvdna lea álo čuollan buot boaittobealássiid beali. Finnmárkkuopmodat lea buorre čoavddus man bokte mii sáhttit mearridit buori resursajuogadeami buot Finnmárkulaččaide.

Oktasaš boahtteáigi

Riddoguolástuslávdegoddi lea buorre evttohus mii addá buot Finnmárkulaččaide vuoigatvuođaid jos evttohus mearriduvvo. NSR berošta báikegottiin, ja lea geahččalan dan čilget buohkaide..

– Eai buohkat dáidde diehtit man ollu barggu ovddeš sámediggepresideanta Sven-Roald Nystø (NSR) ja Sámediggi barge vai Finnmárkkus ja Davvi-Nordlánddas ain lea heivehuvvon bargodivat. cealká NSR-jođiheaddji Silje Karine Muotka.

Organisašuvdnii dárbu

- Mis leat ain ollu politihkalaš hástalusat ja váttis gažaldagat. Sámi vuoigatvuođalávdegotti evttohus movt hálddašit eatnamiid ja čážiid Romssas ja lulás lea oalle stuorra hástalus. – Mun gal bealistan jáhkán ahte mii gávdnat buriid čovdosii maiddái dán áššis, cealká Muotka buriin doaivagiin. Sámediggi galggašii lasihit ruhtadoarjaga sámi organisašuvnnaide vaikkoba vel eambbo.

Gulahallanolmmoš:

Silje Karine Muotka, tel 98487576

Denne artikkelen på norsk