NSR sámediggejoavku lea beahtahallan go lohká ođđa stáhtabušeahta. Stáhtabušeahtas leat unnán vuorddeakeahtes buorit sámiide.

- Ráđđehus čuovvula muhtun muddui boares lohpádusaid maid leat addán Soria Moria-julggaštuasas ja válgagiččus, cealká NSR joavkojođiheaddji Sámedikkis, Aili Keskitalo. - Áidna mii lea ođas lea ahte Sámediggi beassá oastit kanturgálvvuid go fárre Dieđavissui Guovdageainnus.
 
- Muhto lea datteget buorre ahte Ráđđehus lea nákcen čuovvulit soames áššiid maiguin NSR lea bargan guhká Sámediggevuogádagas, erenoamážit namuhan sámi preassadoarjaga lasiheapmi ja lotnolasealáhusaid árvoháhkanprográmma, ja sámi giellahálddašanguovllu viiddideapmi, joatká Keskitalo. Dát sáhttet loktet sámegiela, kultuvrra ja ealáhusaid.
 
Sámediggejoavku lea beahtahallan go huksenprošeavttat eai vuoruhuvvo, nu mo ovdamearkka dihte Ája sámi guovddáža gárvvisteapmi. Sámi dáiddamusea, Várdobáiki ja Beaivvaš Sámi Teáhtera našunála scene eai leat namuhuvvon. Dáiddaoastimiida juolluduvvo eambbo ruhta, muhto ii leat vel čielggas gos dáidda galgá vurkejuvvot ja čájehuvvot.
 
- Mii konstaterer ahte Ráđđehus ii atte eamiálbmotfestiválii Riddu Riđđui knutepunktstáhtusa, cealká NSR-joavkku nubbejođiheaddji Lene Hansen. - Sámi musihkka- ja kulturáŋgirdeaddjit davvin dieđusge beahtahallet.
 
Gulahallan:
Aili Keskitalo, NSR joavkojođiheaddji, 97 12 93 05
Lene Hansen, NSR sámediggejoavkku nubbejođiheaddji, 97 77 34 90

Stáhtábušeahta birra NRK Sámi Radio siidduin

Denne artikkelen på norsk