Norgga Sámiid Riikkasearvvi riikkačoahkkin 2007 čujuha dasa ahte julevsámi guovlu dárbbaša ovttadássásaš dearvvašvuođa- ja sosiálafálaldaga. Vuoras olbmot, sierranasat, dárbbašit dearvvašvuođa- ja fuolahusfálaldaga mii lea vuođđuduvvon sámi kultuvrii ja doaibmá sámegillii báikkálaš eavttuid mielde. Dát lea maid olmmošvuoigatvuohta. Ovttaskas fuolahusdárbbašeaddji olmmoš oažžu árvvohis dilli, jos giellalaš, kultuvrralaš ja oskkolaš dárbbut eai váldojuvvo vuhtii.

Nuorta-Sáltto lea Sámedikki ruđain hábmen ođđa modealla mii čilge ollislaš ovttadássásaš dearvvašvuođa- ja sosiálafálaldaga mii sáhttá ođasmahttit máŋggakultuvrralaš guovllu dearvvašvuođa- ja fuolahusbálvalusaid. Stáiggu ja Hápmira suohkanat leat leamaš mielas prošektii, muhto Divtasvuona suohkan lea leamaš vuostá. Guovllu olbmot vuorásmuvvet ja vuorasolbmuid lohku lassána. Sámediggeráđđi lea gulahallan vuorasolbmuid lagaš olbmuiguin báikkis, ja dan vuođul geassemánu 21. beaivvi 2007 ávžžuhan suohkaniid julevsámi guovllus ja fylkkamánni, mii lea bearráigeahččaneiseváldi, buoridišgoahtit fuolahusdárbbašeaddji sámiid dili, ja sierranasat vuoras sámiid dili.

Norgga Sámiid Riikkasearvi (NSR) doarju Sámediggeráđi ávžžuhusa, ja ávžžuha maid:

• Ráđđehusa ovttas Sámedikkiin meannudit Nuorta-Sáltto ja eará báikkiid prinsihpalaš vuoigatvuođaid oažžut ovttadássásaš dearvvašvuođa- ja sosiálafálaldagaid, ja buohtastahttit Norgga eará vuoigatvuođalaš geatnegasvuođaiguin.
• Divtasvuona suohkan lea aitto šaddan oassi sámi giellahálddašanguovllus ja berre ásahit dearvvašvuođa- ja sosiálafálaldaga fuolahusdárbbašeaddji sámiide, nu ahte sierranasat vuoras olbmuid giellalaš, kultuvrralaš ja oskkolaš dárbbut váldojuvvojit vuhtii. Suohkan berre nuppástuhttit oaivila ja ovdánahttit dearvvašvuođa- ja sosiálafálaldaga julevsámi guovllus. Dát lea dárbbašlaš vai suohkan doahttala sámelága giellanjuolggadusaid.

Loga maid Sámediggepresideantta riikkačoahkkinsártni

Cealkámuš dárogillii