Davviriikkalaš sámekonvenšuvdna sáhttá indirekte veahkehit min vai mii ovdamearkka dihte álkkit oažžut oktasaš sámi skuvlagirjjiid maid sáhttit geavahit sihke Norggas, Ruoŧas ja Suomas, cealká NSR-jođiheaddji Silje Karine Muotka.

Vejolašvuođaid konvenšuvdna

Davviriikkalaš sámekonvenšuvdna geatnegahttá stáhtaid ovttasbargat ja nanne ovttasbarggu.
- Beaivváš dilálašvuođas sáhttá ovdamearkka dihte mearkkašit dan ahte mii oažžut buoret vejolašvuođaid hábmet oktasaš sámi oahppoplánaid ja oktasaš sámi skuvlagirjjiid sámi ohppiide. – Dát lea sihke praktihkalaččat ja ruđalaččat jierpmálaš danne go šaddá hálbbibut ja manná jođáneappot oažžut girjjiid danne go ii dárbbaš ráhkadit sierra girjjiid Norggas, Ruoŧas ja Suomas.

Sámekonvenšuvdna váikkuha maid ollu eará surggiide. Ovdamearkka dihte ahte oppalaččat sámi mediaovttasbargu sáhttá šaddat álkkit, ja váikkuhit buori guvlui girjjálašvuođa sisaoastinortnetáššis ja sámi girjebussiid ektui mat vudjet norggabealde ja ruoŧabealde lullisámi ja julevsámi guovllus. Šaddá álkkit organiseret girjebussiid ja buoret ovttasbargu mo ruhtadit girjebussiid.

– Mii fertet maid muitit sámiid geat orrot Ruošša bealde go mii leat bargamin sámekonvenšuvnna ovddas.

Gelddolaš ministarčoahkkin

- Dát lea stuorra ja viiddis bargu mii beaivválaš dilis sáhttá addá midjiide buoret vejolašvuođaid ovttasbargat riikkarájáid rastá, danne go mii sámit han leat okta álbmot njealji riikkas. Mii ballat gal ahte ođđa ráđđehus Ruoŧas sáhttá maŋidit konvenšuvdnabarggu, muitala NSR-jođiheaddji Silje Karine Muotka vuorrástemiin.

- Danne šaddá gelddolaš gullat movt manná go golbma sámediggepresideantta ja golbma ”sámeministara” deaivvadit Oslos golggotmánu 18. beaivvi. Sámediggepresideanta Aili Keskitalo ja Bargo- ja searvádahttinministar Bjarne Håkon Hansen ovddasteaba Norgga čoahkkimis Oslos golggotmánu 18. beaivvi 2006.

Loga eanet Sámekonvenšuvnna birra dás.

Gulahallanolbmot:

NSR jođiheaddji Silje Karine Muotka leder@nsr.no mátketlf. 98487576
NSR organisatuvrralaš nubbejođiheaddji Marit Einejord org.nestleder@nsr.no mátketlf. 48095289