Stáhtas lea riektegeatnegasvuohta addit sámi álbmogiige vejolašvuođa nannet ja ovddidit kultuvraset, ja maiddái kultuvrra ávnnalaš vuođu masa guolástus gullá. Guolleeriid reguleren ja juogadeapmi lea dakkár ášši mii váikkuha olu mearrasámi guovlluid bargosajiide ja ássamii. NSR sihtá danne ahte sápmelaččat, Sámedikki bokte, aktiivvalaččat galget beassat searvat guolleriggodagaid hálddaseapmái. Departemeanta evttoha addit dorskeeriid guovlluide ja evttoha ahte fylkasuohkanat galget juohkit daid eriid mat gullet sin fylkii. NSR oaivvilda ahte fylkkasuohkanat fertejit ovttasbargat Sámedikkiin eriid juogadeamis vai sámi beroštumit váldojuvvojit vuhtii doarvái bures.
Guolásteami historjjálaš mearkkašupmi ferte váldojuvvot vuhtii
NSR oaivvilda ahte go juogada eriid guovlluide, de ferte juogadanmodealla váldit vuhtii man muddui servodat sorjá guolásteamis dál, ja vel váldit vuhtii man stuorra mearkkašupmi guolásteamis ovdalaš áiggi lea leamaš guhtege suohkanis. Jos eriid galgá juogadit dušše otná loguid mielde, de ii boađe ovdan man ollu guolásteapmie lea mearkkašan dán guvlui. Muhto, jos geahččá guhkes áiggi badjel, de oaidná mo guolástusindustriija ja ealáhus lea lassánan ja unnon ja rievdan. Juogadeami eavttut sáhttet ovdamearkka dihke leat galle fatnasa, galle registrerejuvvon guolásteaddji ja galle industriijabargosaji leat leamaš maŋemus 20 jagi.
Jorgalahttit boasttu guolástuspolitihka
NSR doarju doaimmaid mat aktiivvalaččat jorgalahttet roasu mas sámi riddo- ja vuotnaservodagat guhkes áiggi leat šaddan gillát boasttu guolástuspolitihka dihte. Go juogada dorskeeriid doaresbealbáikkiide, de sáhttá muhtun muddui muhttit maŋemus 15-20 jagi roasu mas leat massán vuoigatvuođaid ja guolástusbargosajiid riddosámi guovlluin.
Geahččalanortnega ferte árvvoštallat
NSR áigu dattege deattuhit ahte ii sáhte dohkkehit ortnegiid mat vel eambbo marginaliserejit mearrasámi guolástusservodagaid. Jos ortnet doarju negatiiva proseassaid ja nanne buresbirgejeaddji guolástusservodagaid dakko bokte ahte heađušta heajosbirgejeaddji guolástusservodagaid, de ortnega ferte nuppes smiehttat. Danne leage dehálaš árvvoštallat ortnega.
Tor Mikalsen, sámediggeáirras 99326744
Ann-Mari Thomassen, sámediggeráđi lahttu 76985031 / 95168941 (mánnodaga, distaga, bearjadaga)
Geir Tommy Pedersen, politihalaš ráđđeaddi tlf. 94823104 geir.tommy.pedersen@samediggi.no
Norsk versjon
Kommenter denne artikkelen
Tips en venn Gå tilbake