Gonagaslaš majestehta Kruvdnaprinsa Haakon, Fylkkamánni, Stuorradikki áirasat, stáhtaráđit, sátnejođiheddjit, fylkkasátnejođiheaddji. Buorit olbmot.
Mearrádus Finnmárkolága hárrái Odeldikkis diibmá miessemánu 24. b. bijai konkerehta sisdoalu guhkes sámi riektegižžui. Mearrádus lea nuppástuhttán dan prinsihpa masa eana- ja čáhcehálddašeapmi galgá vuođđu¬duvvot, dát seremoniija lea danne deaŧalaš. Láhka vuođđu¬duvvo dasa ahte lea dárbu soabahit stáhta ja sámiid gaskka ovddeš eahperievtti dihte, ja julggašta dan ahte lea dárbu sihkkarastit min rikkis kultuvrra ja eallinvuogi maiddái boahtteáiggis.
Finnmárkoláhka lea oktasaš čoavddus daid hástalusaide mat mis leat ovttas. Sámediggái lea deaŧalaš deattuhit daid eavttuid mat ledje vuođđun dasa ahte mii sáhtiimet dohkkehit Finnmárkolága.
Mun válddán dás ovdan soames ášši maiguin fertet bargat:
- Ferte ovddiduvvot láhkaevttohus mas sámiid guollebivdovuoigatvuođat dohkkehuvvojit
- nuortasámiid vuoigatvuođat fertejit sihkkarastojuvvojit
- Mii fertet ollislaččat geahčadit eará lágaid vai dat dávistivčče álbmotriektái ja Finnmárkoláhkii
Stáhta eanaoamastanriekti Finnmárkkus lea álohii leamaš nággovuloš ášši. Identifiseren Finnmárkolága § 5 mielde dat šaddá čilget geas leat vuoigatvuođat eatnamiidda. Galgá ásahuvvot komišuvdna mii galgá čielggadit daid eatnamiid geavahan- ja eaiggátvuoigatvuođaid maid Finnmárkkuopmodat dál váldá badjelasas. Sámediggi vuordá ahte komišuvdna lea sajis jahkemolsumis, ja mis leat vuordámušat komišuvnna bargui. Go dát eavttut leatollašuhttojuvvon, de leat fas ovtta lávkki ovdánan dan barggus maid juo ollu sohkabuolvvat leat bargan.
Mun ledjen mánná Álttá-Guovdageainnu-gičču áigge, ja vuoigatvuođagižžu 70- ja 80-loguin lea báhcán agibeaivái mu muitui. Mun sáhttán ain jurdagiin dego oaidnit TVs nealgudeaddjiid lávus olggobealde Stuorra¬dikki. Mun in goassige vajálduhte dan go politiijafanas Janina bođii Áltái, in ge dan balu ja suhttu go áddejin manne fanas le boahtán, go maŋŋelaš oinniimet ođassáddagiid Stilla politijjaakšuvnna birra. Mun muittán dan áigge viissis sámi jođiheaddjiid, mun muittán sámenissoniid stáhtaministtara kantuvrras. Ollugat leat gártan divrasit máksit dan ovddas go leat searvan vuoigatvuođagižžui. Mu jurdagat mannet buohkaid sin lusa geat leat rahčan dan ala ahte mii galgat beassat vásihit dán beaivvi. Jurdagat mannet maiddái sin lusa geat ovdalis áiggiid leat rahčan vuoigatvuođaid ovddas muhto eai leat šat min gaskkas dáppe, sin mii fertet muitit ja čiekŋalit sin gudnejahttit. Buot dát dál lea oassi sámi, Norgga ja riikkaidgaskasaš historjjás. Muhto vuosttažettiin lea dát okta oassi min oktasaš muittuin geat ássat Finnmárkkus.
Otnáš beaivi lea maid boađus Sámedikki ja Stuorradikki ovttasbarggus diimmá giđa Finnmárkolága ektui. Sámediggi čađahii ráđđádallamiid Stuorradikki Justiisalávdegottiin ja áiggun erenoamážit rámidit Sámedikki dalá presideantta Sven-Roald Nystø, ja justiisalávdegotti dalá jođiheaddji Trond Helleland áŋgiruššamiid. Dát ovttas dálá justiisaministtariin Knut Storberget ja earáiguin lávdegottis Stuorradikkis ja Sámedikkis barge erenoamáš buori barggu oažžun dihte áigái lága. Lea hui somá oaidnit go ollugat dis lehpet dáppe otne.
Mun sávan midjiide buohkaide Finnmárkkus ja olggobealde Finnmárkku lihku Finnmárkolágain.
Giitu beroštumis.
Kommenter denne artikkelen
Tips en venn Gå tilbake