- Mii doarjut ollásit Tupinikim ja Guarani indiánaid rahčamušaid oažžut ruovttoluotta sin árbevirolaš eatnamiid maid stuora cellulosebuvttadeaddji Aracruz lea rievidan sis, cealkiba Guvsám ja Thomassen. Soai čujuheaba dasa go fitnodat Aracrus Cellulose lea leamaš mielde billisteamen jogaid, vuvddiid, kultuvvra ja dán guovllu indiánaid árbevirolaš eallingeainnu. Gonagasa sivjjot, Erling Lorentzen, lea fitnodaga mieleaiggát.
Ii fal ruhtabuhtadus
Nanna Thomassen lea fitnan dán guovllus hupmamin eamiálbmogiiguin geaid árbevirolaš eatnamat leat rieviduvvon. Indiánariidda lea fállojuvvon oalle ollu ruhtabuhtadus massán eatnamiid ovddas. Sii eai siđa ruđa, muhto sihtet iežaset guovllu ruovttoluotta, dahjejuo ođđa eatnamiid, muitala Thomassen.
Rihkku riikkaidgaskasaš lágaid
Norga lea ratifiseren ILO- konvenšuvnna nr 169 ja lea dakko bokte geatnegahttan iežas bargat maiddái riikkaidgaskasaččat eamiálbmogiid ovddas, iige dušše Norgga eamiálbmoga ovddas. Danne ii sáhte dohkkehit go Aracrus Cellulose iežas doaimmaid rihkku sihke riikkaidgaskasaš konvenšuvnnaid ja olmmošvuoigatvuođaid geahččalettiin lasihit iežaset ruhtadietnasiid. – Min mielas Norga ferte leat fárus bisseheamen verrošemiid eamiálbmogiid vuostá ja eamiálbmogiid vuoigatvuođaid vuostá dáid guovlluin, dadjaba Thomassen ja Guvsám.
Kultuvra jávkamin
Nuppi Guaranijoavkku siidaisit muitalii ahte sii leat cuiggoduvvon go leat geavahišgoahtán ”vilges olbmo atnodiŋggaid” nu go diimmu ja dongeribuvssaid, ja dakko bokte galget leat guođđán iežaset kultuvrra. Siidaisit šiitá dán, ja dadjá ahte sin kultuvra ii leat dáid atnodiŋggaid duohken. Son muitalii ahte sin luonddugeavaheapmi, earret eará bivdu ja guolásteapmi, doalahii sihke kultuvrra ja eallingeainnu. Dán lea Aracruz Cellulose okkupašuvdna ja eananrivven dál uhkideamen, muitala Thomassen.
Kommenter denne artikkelen
Tips en venn Gå tilbake