Distaga borgemánu 16. beaivvi lea Norgga Sámiid Riikkasearvi válgamátkkis Moskavuonas. Nordlys journalista lea vuolgan mielde. Journalista fuomáša ahte Lene Marlinas lea gullevašvuohta Moskavutnii. Gaskavahku borgemánu 17. beaivvi čállá Nordlys vuosttašsiidui sensašuvdna, kjendis ja sámevuođa seaguhusášši Lene Marlin čearddalaš gullevašvuođa birra, ja geavaha mu dán oktavuođas.
Identitehta peršuvnnalaš ášši
Journalistii lean dárkilit čilgen ahte identitehta ja čearddalaš gullevašvuohta gullá olbmo persuvnnalaš oktavuođaide, ja lea juohke olbmo duohken válljet mot áigu iežas identitehta čilget. Dákkár ášši berre čállit dušše dalle go lea váldán oktavuođat dainna olbmuin geasa ášši gullá. Vaikko lean ášši čilgen, de Nordlys buktá ášši ovdan, dego mun livččen ávžžuheame Lene Marlina dovddastit sápmelašvuođa. Vaikko lean jounalistii čilgen ahte in siđa dákkár ášši álbmosii jos Lene Marlin ieš ii mieđa dasa. Identitehta ii leat dakkár man sáhttá bágget olbmuide.
Áššit berrejit leat guovddážis
Šállošan go Nordlys aviissa ii oro máhttimin čállit sámi válgaáššiid dákkár journalistihka haga. Sávan politihkka ja áššit sáhttet leat guovddážis válgagiččus dás duohko, eai ge persuvnafalleheamit dahke persuvnallaš áššit mat orrot duolbmumin olbmo, vaikko man olu kjendisat dal ležžet.