Máŋgga sámi servodagain lea sámegiella áitojuvvon ja gos leat dušše moadde vuoras olbmo geat ain sámástit. Mii maid fertet nannet sámegiela doaibmabijuid guovlluin gos sámegiella lea álbmoga beaivválaš giellan. Giella lea iešalddis kulturguoddi. Danin lea ge dehálaš ollislaččat vuoruhit sámegiela ovdánahttima sámiid gaskkas buot agiin ja buot guovlluin gos sámit ásset.
Áigi lea dál láddan váldit adnui Sámeálbmot Foandda doaimmaide mat nannejit sámegiela ja kultuvrra. Dál lea foanddas 21.5 milliovnna ruvnnu maid sáhttá atnit. - Dat eavttut maid Sámediggi bijai 2002 foandda vuostáiváldimii leat dál ollášuvvon, celkkii NSRa presideantaevttohas Aili Keskitalo NSR 2005 Sámediggeválgagičču ráhpamis Guovdageainnus.
Buhtadussan dáruiduhttinpolitihka vahágiidda
Stuorradiggi ásahii Sámeálbmot Foandda 2002is buhtadussan daid vahágiid ovddas maid dáruiduhttinpolitihka lea mielddisbuktán sámegillii ja sámi kultuvrii. Sámediggi bijai dalle dáid eavttuid foandda vuostáiváldimii;
- Ráđđehus galgá bargagoahtit čoavdit 2. máilmmesoađi oahppováillagiid buhtadusášši.
- Stáhta galgá bargagoahtit, ovttasráđiid Sámedikkiin, ovdánahttit ođđa ovttasbargovugiid sámiin ja doaimmaid sámiid ektui.