Ovddadusbellodat johtá válgagižžomátkkis Finnmárkkus. NSR presideantaevttohas Aili Keskitalo dadjá bellodaga oahpes bargovuohkin unnitlogujoavkkuid cielahit, vai eanetlogujoavkkut sin jienastivčče. – Juste nu go lávejitge, de gilvet boasttudieđuid ja dagahit eahpe­sihkár­vuođaid, Aili Keskitalo dadjá. Go lága birra lea váilevaš diehtojuohkin, de leage vejolaš dán láhkái boasttudieđuid juogadit.

Ii leat máhttu sámi áššiin
NRK Finnmárku jearahallamis Jensen gohčoda Finnmárkolága rasisttalažžan; - Danne go ii sáhte leat riekta olbmuid earuhit čearddalašvuođa vuođul, Siv Jensen dajai. Aili Keskitalo dadjá ahte Jensen ii oro diehtimin ahte Finnmárkoláhka lea ráhkaduvvon danne go Norggabealde sápmelaččat leat vealahuvvon, eai ge sápmelaččain leat leamaš seamma vuoigatvuođat ja vejolašvuođat go earáin. – Ii jearahallamis čilgejuvvo MII Jensen mielas lea earuheaddji, ja mot su mielas olbmot earuhuvvojit čearddalašvuođa vuođul, Keskitalo čilge.

- Jensen unnánaš máhttu lea seammá unnán go máŋgga eará ollesolbmo máhttu Norggas. Sis lea dađibahábut áibbas unnán máhttu sámi dilálášvuođain, Aili Keskitalo dadjá. Finnmárko­láhka­gažaldaga birra leamaš sáhka unnimustá 20 jagi. Finnmárkoláhka, nu mo dat šattai, lea kompromissa. – Láhka ii systemáhtalaččat earut Finnmárkku álbmoga, Keskitalo nanne.

Jensen unnánaš máhttu čájeha ahte mii dárbbašit dieđuid lága birra!
Eará eiseváldit riikkain gos leat bargan sullálaš proseassaiguin, leat olles áiggi addán dieđuid šiehtadallamiid birra. – Finnmárkomedia čálii baicce olbmuid dovddui birra, ii ge čilgen lága duohta sisdoalu, Aili Keskitalo oaivvilda. Son čujuha ahte lága vuostálastit ain besset boasttudieđuid gilvit go leat válgagižžostallamin. –Jensen fállá goastebuoiddi. Mii duođaid dárbbašit albma dieđuid lága sisdoalu birra, Aili Keskitalo loahpaha.

Lea áibbas dárbbašlaš ahte duohta ja čielggadeaddji dieđut Finnmárkolága birra farggamusat juhkkojuvvojit, nu mo sihke Sámediggi ja Finnmárkku fylkkasuohkan leat sihtan!