Čállit: Aili Keskitalo, NSR presideantaevttohas ja John Harald Skum, NSR 1. evttohas Álttá/ Fálesnuori válgabiires

Álttás leat báikkálaš guolásteaddjit vikkahan ahte Álttávuonas okta áidna vuotna, Skirvi galggašii leat guollebiebmanrusttegiid haga. Sii hálidivčče dan buohtasatahttit eará vuonaiguin gos leat guollebiebmarusttegat, vai dihtet mo dat váikkuha vuona ja vuotnadorskki gođđima. Báikkálaš guolásteaddjit leat vuosttildan ođastit Skirvvi gaskaboddosaš konsešuvnna. Ášši ii leat vel gieđahallojuvvon Guolástandierektoráhtas.

Mearradoallu lea šaddan stuorát ja dehálaš ealáhussan riddoguovlluide, muhto dán ealáhusas sáhttet leat váikkuhusat eará ealáhusaide. Riddo- ja vuotnabivdu lea árbevirolaččat leamaš deháleamos vuođđun mearrasámi kultuvrii Davvi-Norggas ja ain lea dat mii bisuha olbmuid ássama ollu riddoguovlluin, maid Álttávuonas. Mearra- ja vuotnabivdu lea garra duvdima vuolde máŋgga sajis, maiddái dálá ja ovddeš ráđđehusaid guolástanpolitihka dihte. Guollebiebmanrusttegiid doaimmaid váikkuhusat lea okta duvdagiin. Lihkká lea unnán vuoruhuvvon dutkat biebmoguolásteami váikkuhusaid vutnii. Báikkálaš guolásreddjiid vásáhusat ja áicamat ii leat de váldon vuhtii ja ii ge váldon vuođđun go hálddašit vuonaid. Dáinna ferte juoga dahkkot!

Vuotnaguolásteddjiid ja mearradoalu goabbatlágan beroštumiid sáhttá buohtastahttit boazodoalu ja ođđa ealehusaid álggaheami goabbatlágan beroštumiide. Seamma guovllut geavahuvvojit iešguđet ealáhusain, ja dat ii mana alo njuovžilit. NSR ii vuostálastte mearradoalu  ja eará ođđa ealáhusaid. Dálá ja boahtteáiggi Davvi-Norggas dárbbašit eanet bargosajiid go maid vuođđoealáhusat fállet. Danne lea dehálaš vuoruhit ođđa ealáhusaid ovdánahttima. Min oaidnu lea lihkká ahte ođđa ealáhusaid ovdánahttin ii galgga goaridit ealáhusaid ja bargosajiid mat leat jo doaimmas. De mii gal diškalit máná olggos oktan lávgunčáziin.