Gaskavahku borgemánu 10. beaivvi rájes sáhttá ovdalgihtii jienastit sámediggeválggaide. Lea suohkaniid ovddasvástádus almmuhit gos sáhttá ovdalgihtii jienastit. - Máŋggas lávejit ovdalgihtii jienastit, NSR jođiheaddji ja presideantaevttohas Aili Keskitalo dadjá. Ovdalgihtiijienasteapmi lea erenoamáš dehálaš studeanttaide geat orrot eará sajis, badjeolbmuide geat leat geasseorohagain, ja olbmuide geat eará bargguid geažil leat eret válgabeaivvi čakčamánu 12. beaivvi.

Geavat jienastanvuoigatvuođaidat

- Lea dehálaš searvat válggaide, joatká Aili Keskitalo gii sáhttá šaddat vuosttaš nisson gii beassá sámediggepresideantan. - Jienasteaddjit mearridit geat galget stivret Sámedikki boahtte áigodaga, Aili Keskitalo dadjá.

Válganjuolggadusat leat rievdaduvvon, ja dán háve galget válljejuvvot 43 áirasa Sámediggái. Njeallje dássenáirasa dahket dán hui gelddolaš válgan. Dássenáirasiid ožžot dat válgabiiret main leat eanemus dohkkehuvvon jienat. Dat máksá dan ahte dássenáirasat eai leat jienastuslogu duohken, muhto dan duohken gallis jienastit. Jos olbmot eai fina jienasteame, de válgabiire ii dáidde oažžut dássenáirasa, man muđui livččii sáhttán oažžut. Danne leage hui dehálaš fitnat jienasteame. - Jos it fina jienasteame, de leat diktime earáid mearridit du ovddas, dadjá Aili Keskitalo

Dárkkis ahte leat sámi jienastuslogus

Fertet leat sámi jienastuslohkui čálihuvvon ovdal miessemánu 31. beaivvi dán jagi, jos galggat beassat jienastit. Jienasteaddjit, guđet leat jienastuslohkui rievttes láhkái čálihuvvon, leat ožžon válgakoartta poasttas. Jienastuslohku lea maid biddjojuvvon almmolaš geahčadeapmái, ja jos ležžet boasttuvuođat, ii ge du namma oidno, de fertet dakkaviđe váldit oktavuođa Sámedikkiin. Suohkanat čađahit válggaid, ja maiddái sámediggeválggaid.

Sávvá eambbo nissoniid beassat Sámediggái

- Dáidda válggaide lea Norgga Sámiid Riikkasearvi nomineren máŋga čeahpes nissona listonjunnošin. NSR oaivvilda ahte Sámediggi ferte ovddastit olles álbmoga ja Sámedikkis ferte leat nanus legitimitehta. Mannan áigodagas ledje 7 nissonáirasa 39 árasis, dadjá Aili Keskitalo ja nanne ahte NSR lea áigumin politihkalaš áigumušaidis doalahit, vaikko Sámediggái beasadeaddji njunuševttohasaid gaskas leat ollu ođđa olbmot. - Ođđa áirasiin leat ođđa bargovuogit, ja Sámediggebárggus áiggošin rabas ja njuolga ságastallama sámi servodagain, Keskitalo dadjá NSR njunuševttohasaid birra. - Illudan jienasteddjiiguin deaivvadit, Aili Keskitalo loahpaha, ja illuda válgagižžostallamii.

Dieđut interneahtas:

Aili Keskitalo preassagovat: http://www.nsr.no/website.aspx?objectid=1&displayid=9354

Dieđut presieantaevttohasa birra: http://www.nsr.no/website.aspx?displayid=9065

Dieđut NSR birra: http://www.nsr.no

Gielda- ja guovlodepartemanta: http://www.dep.no/krd/valg2005

Sámediggi: http://www.sametinget.no/Artikkel.asp?AId=415&back=1&MId1=16&MId2=219&MId3=234