– Hálidan rámidit Sámedikki ja maiddái sin šiehtadalliguovtto Jon Meløy ja Lennart Mikkelsen. Soai čájeheigga duohta dáhtu miehtat min gáibádusaide, čilge Synnøve Persen.

Ođđa bargovuohki

Sámi dáiddasearvvit leat vuosttaš ealáhusovddasteaddjit geat leat bargan oažžut šiehtadallanvuoigatvuođa Sámedikkiin, ja leat lihkostuvvan dainna earenoamáš bures. Dáiddárat leat guhkit áiggi bargan oažžut ruhtajuolludeaddji eiseválddiid ipmirdit ahte leat oktiibuot oalle ollu dáiddárat geat ellet dáidagiin. Diibmá mihte dáiddasearvvit ja Sámediggi ahte dás duohko galgá leat SDR mii šiehtadallá ruđa iežas miellahttoservviide oktasaččat. Ovdal lei nu ahte juohke searvi sáddii dábálaš lági mielde jahkásaš ruhtaohcama Sámediggái.

Ođđa virgi hálddáhussii

Šiehtadus mii vuolláičállojuvvui ikte Kárášjogas guoská jahkái 2006. Dáiddáriid šiehtadallit nagodedje oažžut ovtta ođđa virggi iežaset SDR hálddáhussii. Oktiibuot ožžot organisašuvnnat ja SDR hálddáhus 1.4 mill. boahtte jahkái. Dat lea 400.000 kr eanet go dat maid dán jagi ožžot.

- Dál lea áibbas ođđa dilli. Dáiddasearvvit  ja SDR dihtet dál juo maid  ožžot boahtte jahkái doaibmadoarjjan Norgga Sámedikkis, mii lea min váldo ruhtadeaddji. Ja searvvit sáhttet ge buoret áiggis plánegoahtit doaimmaid, lohká SDR váldočálli Elle Márjá Vars.

Eambbo  stipeanddat

Dasa lassin ožžo dáiddárat 2 ođđa bargostipeandda, nubbi lea 5 jagi stipeandda mii lea eallilan dáiddáriidda.

- Oaččuimet vel nuppi bargostipeandda nuorra dáiddáriidda. Ja dasto leat vuhtiiváldán sihke álggahedddjiid ja sin geat guhká leat bargan dáiddárin ja ánssášit sierra stipeandda. Leimmet gáibidan  2 dáhkádusdietnasa dáiddáriidda, muhto Sámediggi ii miehtan dasa. Ja dasto mii soabaimet 2 ođđa stipeandda. Lea viehka buorre go Sámediggi mieđai lasihit stipeanddaid. Dat veahkeha ja movttiidahttá dáiddáriid, lohká Synnøve Persen.

Dáiddafoanda

Go SDR Šiehtadallanlávdegoddi doalvvui dáiddáriid gáibádusa Sámediggái 2. beaivvi miessemánus dán jagi, de dat sisttisdoalai earet eará gáibádusa ahte oažžut 500.000 kr sierra Dáiddafondii maid dáiddárat ieža stivrejit. Sii gáibidedje dan danin go Kulturfoandda juolludeamit sámi dáiddáriidda leat njiedjan jagis jahkái dan rájes Sámediggi heaittihii Sámi kulturráđi gos dáiddárat ledje mielde stivremin ruhtajuolludemiid.

Dáiddáršiehtadusa sisdoallu

Doarjja dáiddaorganisašuvnnaide, SGS, SDS, STS, Juoigiid Searvi, Foreningen Samiske Komponister ja Sámi Dáiddárráđđi: 1.4 mill. (400.000 kr. eanet go dál)

Stipeanddat sámi dáiddáriidda: 1.750.000 kr ( 350.000 kr. eanet go dál). Sámi dáidaga oastinortnegii: 350.000 kr. (100.000 kr eanet go dál). Dáiddafoanda: 500.000 kr. Dát lea áibbas ođđa ortnet mii álggahuvvo jagis 2006.

Heahpadin Rutti ja Supmii

Dál lea Norgga Sámedikki juolludeapmi sámi dáiddáriidda lassánan 4 millijuvdnii.  Dasa lassin ruhtada vel Norgga Sámediggi iežas kulturfoanddas sihke sámegielgirjjjiid almmuheami, sámi lágádusaid ja eará dáidaga almmuheami buot sámi dáiddáriidda beroškeahttá riikkarájiin. Ruota Sámedikki ollislaš juolludeapmi sámi dáiddáriidda lea maŋemus jagiid leamaš 400.000 kr. oktiibuot. Suomabeale juolluduvvo arvat unnit doarjja. Ii Suoma ii ge ruota Sámediggi juollut ruđa dáiddastipeanddaide.

SDR Šiehtadallanlávdegoddi

SDR Šiehtadallanlávdegottis leat mielde Synnøve Persen, jođiheaddji, Biret Risten Sara, Anders Somby ja SDR váldočálli Elle Márjá Vars.