- Vaikke vel Finnmárkkuláhka mearrkašii ahte dohkkehuvvojedje dat eanavuoigatvuođat mat sámiin ja finnmárkolaččain juo leat, de Mearraresursalávdegotti eanetlohku fas manná áibbas nuppi guvlui, mii lea iešvuosttaldeaddjin. Dan dahká vaikke vel Odeldiggeproposišuvnnas Finnmárkkulága oktavuođas čujuhuvvo njuolgga sámi guolástanvuoigatvuođaide, dadjá Berit Ranveig Nilssen.

Dálá dilli lea nu ahte ii oktage oamas meara luođuresurssaid. Mis lea rabas guollealmennet ja lea buohkaidvuoigatvuohta beassat ávkkástallat guolleresurssaiguin, vaikke vel lágat ja láhkaásahusat muddejit dan. Ovdalis čielggadeamit leat deattastan ahte sámi guovlluin lea virolaš vuoigatvuohta beassat ávkkásatallat meararesurssaiguin. Maiddái Alimusriekti lea dan nannen nugohčoduvvon Gáivuonduomu bokte. Eará guolleriikkain maiguin Norgga sáhttá buohtastahttit, ovdamearkka dihtii Islánddas ja Fearasulluin, gullet mearraresurssat, dás maiddái guolit, álbmogii.

- Dát han lea ge buot váddáseamos. Opmodatvuoigatvuođa sirdimis stáhtii priváhtarievttálaš áddejumis sáhttet leat váikkuhusat dan boaresvirot vuoigatvuhtii, mii báikegottiid álbmogis lea, sihke sámi guovlluin ja miehtá rittu, beassat ávkkástallat mearraresurssaiguin. Dát rihkku dan ávnnaslaš kultursuodjaleami, mii sápmelaččain lea vuođđolága vuođul, ja nationála rievtti muđuige, dan lassin ahte rihkku daid álbmotrievttálaš geatnegasvuođaid, mat stáhtas leat sápmelaččaide eamiálbmogin. Lea stuorra váili go Mearraresursalávdegotti eanetlogus ii leat leamaš ii dáhttuge čielggadit dáid beliid, loahpaha Nilssen ja čujuha dasa ahte dat han lei oassi lávdegotti mandáhtas.