NSR sámediggeáirras Åge Nordkild Davvi-Nordlánddas ovddidii ođđa ášši Sámedikki dievasčoahkkimii Narviikka suohkana plánaid birra. Narviikka suohkan lea áigumin váldit Árajávri Áravuomis juhkančáhcin Ráhkká álbmogii. –Ii go Narviikka suohkan dieđe ahte Áravuomis ásset olbmot, Åge Nordkild gahčá.

Hehttehusat vaikko man olu

Áravuomis orrot sullii 100 olbmo. Eanas olbmot leat sámit. – Árajávri lea gili vuolimusas, ja dieđusge jos dan váldá juhkančáhcin, dalle han bohtet hehttehusat vaikko man olu. Dat čuohcá dieđosge Áravuomi ássiide, Åge Nordkild sárdnu.

Åge Nordkild mielas váldá dát álfárot bargomovtta eret dain guđet barget giliovddidemiin. – Go ii leat šat lohpi durket, ii ge šaddadit maidege, ii ge leat lohpi hukset makkárge ođđa huotnahiid, na dalle gal bisána buot ovdáneapmi, Nordkild sárdnu.

Áravuopmis johtet olbmot eret

Åge Nordkild lea heammástuvvon go Narviikka suohkan dáinna lágiin láhtte. – Sii eai leat makkárge váikkuhusguorahallama dahkan dákkár plánaide, Nordkild sárdnu. Åge Nordkild sárdnu ahte sámi vuođđoealáhusaid, nu mot eanandoalu ja sávzadoalu ferte heaittihit. –  De gal johtet gaitiinnat eret Áravuomis, Nordkild sárdnu. Su mielas lea Narviikka suohkan duolbmumin Áravuomi sámiid.

------

Oktavuođaolmmoš: Åge Nordkild, tlf. 951 40 542