- Eamiálbmogin Norggas lea sámiin dat vuoigatvuohta ahte eiseválddit galget ráđđádallat singuin dakkár áššiin, mat gusket njuolgga sidjiide. Dát vuoigatvuohta lea nannejuvvon ILO-soahpamušas nr. 169 eamiálbmogiid ja čearddalaš álbmogiid hárrái iešmearrideaddji riikkain, maid Norga dohkkehii 1990, dadjá  gielda- ja guovloministtar Erna Solberg. - Vai áššit mat gusket njuolgga sámiide, meannuduvvojit dohkálaččat, de lea deaŧalaš ásahit dakkár bargovuogiid, maid sihke stáhta eiseválddit ja Sámediggi atnet dohkálažžan, dadjá gieldaministtar.

Vuođđun ráđđadallanbargovugiide lea earret eará ahte:

·        Sámediggi galgá oažžut ollislaš dieđuid áigeguovdilis ášši guoskevaš beliin nu árrat go vejolaš, ja buot dásiin ášši meannudeamis.

·        Sámediggi galgá oažžut áiggi árvvoštallat áigeguovdilis gažaldagaid ja addit ruovttoluottadieđu. Ruovttoluottadieđut evttohusaide galget addojuvvot lagabui šiehtaduvvon áigemearis.

·        Galgá láhččojuvvot das ahte ráđđádallanproseassa ii loahpahuvvo nu guhká go Sámediggi ja stáhta atnet vejolažžan soabadit.

·        Ulbmilin lea juksat ovttamielatvuođa buotlágan lágaid ja doaibmabijuid oktavuođas, mat váikkuhit sámiid njuolgga.

- Ovttamielatvuohta dáid ráđđádallanbargovugiid oktavuođas lea hui deaŧalaš vai ovddiduvvojit ja nannejuvvojit ovttasdoaibmanvuogit stáhta ja Sámedikki gaskkas, dadjá Sámedikki presideanta Sven-Roald Nystø.  –  Bargovuogit dagahit vejolažžan ahte searvevuohta stáhta ja Sámedikki gaskkas sáhttá ovdánit, juoga mii lea deaŧalaš go galgá nannet sámi kultuvrra ja sámi servodagaid, loahpaha Sámedikki presideanta.