NSR SERVVIIDČOAHKKIN ÁLTTÁS 9.-11. 5 2003:

Cealkámuš Finnmárkkulága hárrái

NSR’a vuođđooaidnu lea ahte sápmelaččat eai leat goassige addán eret makkárge vuoigatvuođaid eatnamiidda, čáziide dahje luondduriggodagaide. Eai šiehtadallamiid bokte, vuovdima bokte dahje eará láhkai. NSR vuordá ahte Sámediggi ii mange láhkai sirdá sámiid vuoigatvuođaid earáide.

NSR’a mihttomearri lea ahte Sámediggi nu stuorra go vejolaš eanetloguin čielgasit cealká ahte otná láhkaevttohus ii sáhte geavahuvvot ja ahte proseassa ferte ođđasit álggahuvvot. Ođđa proseassa vuođđun fertejit leat ovddeš riektečielggadeamit ja Sámedikki cealkámušat.

NSR lea lojala Finnmárkku álbmogiin dán áššis. Vuoigatvuođaid ákkastallamis leat vuođđun sámi vuoigatvuođat dego álbmogin ja eamiálbmogin, muhto báikkálašolbmuid vuoigatvuođat galget sihkkarastojuvvot olles Finnmárkkus.

NSR ávžžuha Finnmárkku ássiid, fylkkagieldda ja gielddaid čuovvut Sámedikki dievasčoahkkima go gieđahallet finnmárkkulága miessemánu 21. b. 2003.

NSR’a jođiheaddjit dorjot dan maid sámediggeráđđi lea ovdánbidjan áššis 21/03 ja konklušuvnna gos celkojuvvo ahte otná láhkaárvalus ii sáhte dohkkehuvvot.

Dasa lassin gáibidit NSRa jođiheaddjit ahte Sámediggi ferte beassat šiehtadallanposišuvdnii riikka láhkaeiseváldiiguin, nu go ILO-konvenšuvnnas gáibiduvvo. Ferte boahttit čielgasit ovdan ahte Sámediggi galgá leat fárus hápmemin ođđa riektevuođu.

Gáibiduvvo ođđa riektevuođđu, mii maiddái ferte sistisdoallat:

• Riddoálbmoga vuoigatvuođaid, dás maiddái vuoigatvuođat sáltečáhcebivdui ja mearraareála geavaheapmi.
• Vuoigatvuođaid riggodagaide bajábealde ja vuolábealde eatnama, dás maiddái vuoigatvuođat minerálaide, mat fertejit čielggaduvvot guovlluin maidda guoská ILO artihkkal 14.
• Boazodoalu areála suodjaleami, dološ áiggi rájes geavaheami, sisriikkalaš rievtti ja álbmotrievtti vuođul.
• Sihkkarastima guohtonvuoigatvuođaide meahccis šibihiid várás.
• Sámi sierravuoigatvuođat iešlágan joavkkuide, erenoamášit sii geat ávkkástallet meahcceriggodagain ealáhusa ja duoji oktavuođas, ii sáhte badjelgehččojuvvot. Dát ferte čielggaduvvot ođđa láhkaevttohusas.
• Sámi vuoigatvuođat čáhcedagain Deatnu ja Njávddámis ferte čielggaduvvot ja vuođustuvvot lágas.

Stuorradiggi muittuhuvvo das makkár geatnegasvuođat sis leat vuođđolága 110a vuođul, ja daid álbmotrievttálaš geatnegasvuođaid birra mat Norggas leat. NSRa ráva lea ahte Stuorradiggi sádde lága ruovttoluotta, jus juo Ráđđehus ieš ii gease dan.