NSR-SáB oktasaš nominašuvdnačoahkkin bijai Beaska Niillasa oktasaš válgalistta bajimuš evttohassan. Deanu ja Unjárgga NSR ja Sámeálbmot bellodaga báikkálaš servviid 24 ovddasteaddji ledje ovttamielas dasa ahte nuorra guolásteaddji ja duojár Deanus ere galgá leat NSR ja SáB váldu láidesteaddjin boahtte čavčča sámediggeválggas.

 - Go vuos lávdegoddi mu dáhtui, de mun in leat nu guhká dárbbašan ráhkkanit ja láddadit iežan dasa ahte váldit badjelasan dákkár dehálaš luohttámuš doaimma, dajai ieš nuorra sámepolitihkkár maŋŋá válljema, ja giittii luohttámuša ovddas, ja go NSR-SáB su oskkildit fállat jienasteaddjiide njunuš evttohassan.

Fargga olu gávttehasat Várjjagis

Beaska Niillas lea 30 jagi boaris, ja lea guhká juo beaggán leat guovllu nuoraid ealljáris ovddasteaddjin, ja almmái gii háliida čađahit bargguid, ii ge dušše hállat daid birra. Juovllaid áigge gáktedáhpáhus Sirpmás lea beaggán viidát, ja nominašuvdnačoahkkimis Vuotnabađas duorastaga lohpidedje ge čoahkkima deanunuorat ráhkadit fargga seammalágan dáhpáhusa Unjárgii. Lohpádus lea ahte Nuorta-Finnmárkku sámi nuorat galget fuobmágoahtit guovllu sámi árvvuid.

Nuorra politihkkárat

Mátta-Várjjaga Christina Henriksen lea nubbin NSR-SáB oktasašlisttas. Son ge lea 30 jagi boaris, ja lei máŋga jagi Barentsčállingotti eamiálbmotáššiid ráđđeaddi. Dan maŋŋá lea leamaš Tromssa fylkkagieldda riikkaidgaskasaš-ossodaga ráđđeaddin, ja maŋemuš jagi ráđđeaddin Davvi-Norgga Eurohpá kontuvrras Brusselis. Dál lea fárremin ruoktot Girkonjárgii.

Listta nuoramus lea allaskuvla-studeanta, 19 jahkásaš deanunieida Marion Ravna, ja boarraeamos unjárgganisu Lilly Roska, gii lea 55 jagi, ja listta 3. evttohas. Listta gaskameari ahki lea 33 jagi.

NSR/SáB oktasašlista – Válgabiire 1  

1. Beaska Niillas, 30 j, guolásteaddji ja duojár, Fanasgieddi, Deatnu

2. Christina Henriksen, 30 j, ráđđeaddi, Girkonjárga, Mátta-Várjjat

3. Lilly Roska, 55 j, ASVO-lágideaddji, Njiđggujotnálbmi, Unjárga

4. Ellinor Guttorm Utsi, 47 j, boazodoalli ja duojár, Hillágurra, Deatnu

5. Magnhild Stock, 38 j, ekomiijaráđđeaddi, Čáhcesuolu

6. Áike Niillas Selfors, 28 j, studeanta, Lálloš, Deatnu                                  

7. Tom Henrik Ellingsen, 34 j, oahpaheaddji, Unjárga

8. Charlotte Angell, 34 j, ovdaskuvlaoahpaheaddji, Gilevuotna, Davvesiida

9. Sini Rasmus, 33 j, oahpaheaddji, Unjárga

10. Marion Ravna, 19 j, studeanta, Máskejohka, Deatnu

11. Per Anders Store, 26 j, musihkkapedagoga, Girkonájrga    

12. Ánde Trosten, 23 j, eaktodáhtolašbargi, Árbánatjohka, Deatnu

Les på norsk / loga dárugillii