NSR jođiheaddji Aili Keskitalo lea odne Álttás, doppe son doallá sártni sihke Álttá joatkkaskuvllas ja almmolaš ávvudeamis man Álttá Sámiid Searvi lágida. 

- Hálidan cealkit dearvvuođaid olles sámi álbmogii odne. Dat mii lea erenoamáš Sámi álbmotbeivviin lea ahte mii ávvudat dan oktan álbmogin njeallji riikkas. Lujávrris nuortan, Anára bokte, Áltái ja Deardnái ja Mjøsaguovlluide lullin. Mii ávvudat ahte vuosttaš háve mii čoahkkaneimmet Troandimii 1917s, ja ahte mii leat searvvis našunála oktavuođas vaikke vel riikkaráját ain juhket min iešguđetge hálddahuslaš ovttadagaide, dadjá Keskitalo guhte illuda ávvudit.

Son deattuha ahte dá vuosttamužžan lea ávvubeaivi goas mii ávvudat sámi kultuvrra ja dan man leat olahan, ja son deattuha ahte lea sámevuođa rámisvuohta mii lea deháleamos.

- Dán beaivvi mii ávvudat iežamet kultuvrra ja čájehat rámisvuođa dan ektui. Dat ii leat álo leamaš nu diehttelas. Go mii dál ávvudat álbmotbeaivvi 20. geardde, de ovtta láhkai orru ahte lea hui áigá go dat ásahuvvui, go beaivvis leat dál sierra árbevierut, seammás go mun bures muittán dan áiggi go mis ii lean dát vejolašvuohta ávvudit ja čájehit rámisvuođa.

Dá leat maid oasit maid son guoskkaha sártnistis Álttá joatkkaskuvllas odne. Doppe son muitala áiggi birra go sus ledje smarvejuvvon vuovttat ja gávtti vuolde sus ledje guottážat olggiid alde, ja ieš lei joatkkaskuvlaoahppi ii ge oahppan maidige sámi historjjá birra, ja guhkkin eret maidige historjjálaš beaivvi birra mii lei guovvamánu 6. b. 1917.

- Munnje lea dehálaš ahte boahtá ovdan ahte vaikke mis odne maid leat hástalusat ja eat álo dohkkehuvvo sierra álbmogin iežas kultuvrrain, de lea ollu mii lea dáhpáhuvvan dan rájes go mun ledjen joatkkaskuvllas, ja eanaš buoret guvlui, muitala NSR-jođiheaddji sártnis birra.

Ailii lea guovvamánu 6. beaivi beaivin sihke manifestašuvdna ja niehku ovttastuvvon Sámi birra. - Beaivi doaibmá bures muittuhussan ahte mii leat okta álbmot njealji riikkas. Dán fertet mii muitit vai eat vajáldahte dan árgabeaivválaš doaimmaid siste, ja ieš niegadan ain boahtteáiggi birra gos mis lea oktasaš Sámediggi, seamma vuoigatvuođat buot riikkain, ja duođaid sáhttit sártniid doallat ja leat čoahkkis oktan álbmogin nu go mii jo leat, loahpaha Keskitalo.

Lihkku beivviin!