NSR oaivvilda ahte Sámedikkis galgá leat čielga politihka dan ektui maid hálidat Finnmárkkuopmodagain, FeFo:in. NSR lea danne hui positiivvalaš dasa ahte FeFo-stivra lea maŋidan meannudeami ášši eaiggátstrategiijaid ja dietnasa geavaheami birra dassá Sámediggi lea meannudan ášši dán vahku.

- Mii leat ilus go Sámedikki dievasčoahkkin dál oažžu dadjat oaivilis, nu go Finnmárkku fylkkagielda jo lea dáhkan meannudemiin geassemánus, dadjá NSR parlamentáralaš jođiheaddji, Aili Keskitalo.

- Mii oaidnit ahte Sámediggeráđđi doarju evttohusa man oktasaš bargojoavku, mas FeFo, fylkkagielda ja Sámediggi leat mielde, lea buktán. Dan dahkat mii NSR:as maid, muhto min mielas lea dárbu deattuhit ja dagahit ahte Sámedikki aktiivvalaš jurddašanvuohki FeFo hárrái boahtá čielgasit ovdan. Dan mii dahkat iežamet liigeevttohusain, joatká Keskitalo.

- Mii hálidat ahte Sámediggi galgá leat čielggas dan hárrái ahte FeFo eaiggádus-hálddašeami mihttu ii galgga leat eanemus lági mielde dinet. Mii jáhkkit ahte Finnmárkku álbmoga deháleamos sávaldat lea ahte bálvalusain lea kvaliteahta ja ahte leat vuollegis geavaheddjiidgolut, ja dás mii oaidnit ahte fylkkagielda oaivvilda seamma go mii, oaivvilda Keskitalo.

- Goitge vuordit mii ahte áiggi mielde čoggo dienas. FeFo dietnasa juogadeamis ferte leat legitimitehta Finnmárkku álbmogis. Danne ferte árvvoštallojuvvot ahte galgá go hálddašit dietnasa foanddas mii geavahuvvo álbmotávkkálaš ulbmiliidda, man Sámediggi ja Finnmárkku fylkkagielda ovttas hálddašeaba, lasiha Keskitalo. - Min mielas lea dehálaš ahte Sámediggi muittuha ahte FeFo doaimma dienas galgá hálddašuvvot nu go Finnmárkkulága ulbmilpáragráfii lea čállon, gos deattuhuvvo ahte sámi kultuvra, boazodoallu, meahcci ávkkástallan, ealáhusdoallu ja servodateallin galgá erenomážit vuhtii váldojuvvot.

NSR evttohus dagaha maid vejolažžan ahte FeFo sáhttá jođihit ealáhusdoaimma, muhto dáhttu ahte ovdánahttojuvvojit njulgosat dasa; gávpelágádusaid ovdánahttin ferte dahkkot Finnmárkkulága ulbmila mielde ja dagahit báikkálaš eaiggátvuođa. NSR oaivvilda ahte dát njulgosat fertejit sihkkarastit vejolaš sámi stivrasaji.

Luondduduohtademiid ja eananopmodagaid vuovdima ektui deattuha NSR ahte loahpalaš vuoigatvuođat eatnamiidda ja čáziide Finnmárkkus eai leat vel čielggaduvvon. Dán oaivvildit sii ahte FeFo álo ferte atnit muittus eaiggádus-hálddašeami oktavuođas.