– Mii eat sáhte dohkkehit ahte norgga stáhta hilgu dán ládje hilgu mearrasámi bivdovuoigatvuođaid.  Min mielas mearrádus njulgestaga rihkku daid riddoguolástanvuoigatvuođaid mat sámiin ja muđui riddo- ja vuotnaguovllu ássiin don doloža rájes leat leamašan min lagamus guovlluin. Danin mii eai oainne eará vejolašvuođa go ahte ášši loktejuvvo duopmostuoluid ovdii, dadjá sámediggeáirras ja   NSR jođiheaddji, Aili Keskitalo.

NSR sihtá ahte Sámediggi dál juo rádje návccaid dasa ahte rievttálaččat čielggadit guolástanvuoigatvuođaid –«Borjadat» áŋgiruššama bakte.  NSR evttoha ahte Sámediggi rádje 1 miljovnna ruvnno, 2012 dárkkistuvvon bušeahta meannudeami oktavuođas. Juolludeami berre čuovvolit Sámedikki 2013 bušeahta meannudeami oktavuođas.

Áŋgiruššan mearkkaša nannet oktavuođaid ja doarjja vuoigatvuođaguddiide ja berošteddjiide geat áigot iskat iežaset guolástanvuoigatvuođaid  duopmostuoluin sihke našunála ja riikkaidgaskasaš dásis. Dasa lassin galgá áŋgiruššamis maiddái deattuhit  juridihkalaš, ekonomalaš ja praktihkalaš veahki dassážiigo leat iskan daid rievttálaš vejolašvuođaid mat gávdnojit.  Resursat galget maiddái geavahuvvot diehtojuohkimii ja gulahallamii ášši birra.

- Mii eat hilggo mearrasámiid vuoigatvuođaid, ja vuordit govda doarjaga áššái go mii maŋŋelis dan vahkus ovddidit evttohusa bušeahtameannudeami oktavuođas. Bargodáhttu mis gal lea, lihttu galgá nannejuvvot ja Sámediggi ferte dán vahkus álgit ruđaid ráddjemis bargui ahte oažžut dohkkehuvvot min historjjálaš guolástanvuoigatvuođaid, deattuha NSR jođiheaddji, Aili Keskitalo.

------

På norsk / dárugillii