Nu go dáhpi lea de lea NSR báikkálašsearvi mii bovde riikkačoahkkimii ja veahkeha dan čađahit. Maŋŋá go riikkastivra bivddii báikkálašservviid bovdet 2012 riikkačoahkkimii de bođii sávaldat Romssa Sámi Searvvis ja Kárášjoga sámesearvvis beassat lágideaddjin.

NSR 41 ovddit riikkačoahkkima leat dollojuvvon čuovvovaš báikkiin: 1968 Guovdageaidnu; 1969 Kárášjohka; 1970 Guovdageaidnu; 1971 Deatnu; 1972 Skuvvanvárri, Porsáŋgu; 1973 Stuorravuonna, Unjárga; 1974 Guovdageaidnu; 1975 Ivgubahta, Omasvuotna; 1976 Kárášjohka; 1977 Aarporte; 1978 Áltá; 1979 Snoasa; 1980 Kárášjohka; 1981 Evenášši, Skánik; (1981 Áltá, erenoamáš jahkečoahkkin); 1982 Unjárga; 1983 Gáivuotna; 1984 Guovdageaidnu; 1985 Oslo; 1986 Dálošvággi, Gáivuotna; 1987 Kárášjohka; 1988 Čáhcesuolu; 1989 Áltá; 1990 Vuotnabahta, Leaŋgáviika; 1991 Snoasa; 1992 Olmmáivággi, Gáivuotna; 1993 Guovdageaidnu; 1994 Leavdnja, Porsáŋgu; 1995 Øse, Rivtták; 1996 Fuossku; 1997 Áltá; 1998 Guovdageaidnu; 1999 Kárášjohka; 2000 Plassje; 2001 Romsa; 2002 Svanvik, Mátta-Várjjat; 2003 Namsskogan; 2004 Hárštá; 2005 Áltá; 2006 Vuonnabahta, Unjárga; 2007 Bådåddjo; 2008 Guovdageaidnu ja 2010 Nárviika. Maŋŋá go njuolggadusat rievdaduvvojedje 2008s de ii lágiduvvon riikkačoahkkin 2009s mii lei válgajahki. Njuolggadusaid rievdan 2010s dagahii ahte riikkačoahkkin dál lágiduvvo juohke nuppi jagi, daid jagiid go ii leat riikkačoahkkin de lágiduvvo nu gohčoduvvon luohttevašolbmuidkonferánsa. Vuosttaš almmolaš luohttevašolbmuidkonferánsa lágiduvvui 2011s Girkonjárggas, Mátta-Várjjagis.

NSR riikkastivra lea čoahkkimis njukčamánu 27. b. dán jagi áššis 06/12 ovttajienalaččat meannudan čuovvovačča:

----- Leat boahtán ohcamat Romssa Sámi Searvvis ja Kárášjoga sámesearvvis lágidit NSR riikkačoahkkima 2012s.  Riikkastivra giitá goappašiid báikkálašservviid go leat bivdán beassát lágidit riikkačoahkkima. Riikkastivra oaidná ahte goappašat báikkálašsearvvit ovdanbuktiba jurdagiid buriid rámmaide riikkačoahkkimii, ja riikkastivrras leat buorit ákkat lágidit riikkačoahkkima goappašiid báikkiin.

Go riikkastivra vállje báikki riikkačoahkkima lágideapmái de deattuha NSR strategiija- ja doaibmaplána 2010-2014 ovddas gos politihkkaovdáneami váldočuoggá vuolde čuožžu ahte NSR galgá ođasmahttit politihka mii guoská sámegiela sihkkarastimii ja nannemii. Viidásat čuožžu váldostrategiija vuolde "Vuoruheapmi sámi gielas ja kultuvrras": NSR meannudii riikkačoahkkimis 2007s bargat dan ala ahte Sámeálbmoga foanda rahppo, ja meannudii maid vuoruhuvvon vuoruhanáššiid áigodahkii 2013 rádjai. 2013 galgá Sámediggi árvvoštallat ođđa vuoruhanáššiid, ja dan prosessii galget báikkálašsearvvit ja 2012 riikkačoahkkin searvat.

Maŋŋá digaštallama dan birra ahte Romssa suohkan ozai searvat sámegiela hálddašanguvlui ja gesii ohcama ruovttoluotta, orru leamen ulbmillaš ja áigeguovdil ahte riikkačoahkkin lágiduvvo Romssas. Riikkastivra hálida maid oasálastit bisuhit fokusa sámi gávpotbirrasiin ja daid hástalusaid mat gusket justa daidda. -----

Riikkastivra illuda riikkačoahkkimii Romssas, 11 jagi maŋŋá go Romssas maŋimuš lei dákkár dáhpáhus. 2012 riikkačoahkkimis lea lunddolaš ahte 2013 sámediggeválggat leat guovddážis, ja earret eará de galgá NSR válgaprográmma sámediggeválggaide gárvejuvvot dalle, ja NSR presideantaevttohas 2013 válggaide galgá válljejuvvot.

Lea ain muhttin áigi dassážii, muhto mii hálidat goitge sávvat bures boahtima Romsii čakčat!

----------

På norsk / darogilli