– Mii leat duhtavaččat dainna ahte Sámedikkis bođii ovdan cuoŋománu meannudeami oktavuođas ahte orru leamen stuorát áddejupmi posišuvnnas Sámedikkis dárbui ásahit áittardeaddji sámegiela hárrái, nu go NSR lea evttohan jo máŋgii, dadjaba sámediggeáirasguovttos Silje Karine Muotka ja Trond Are Anti. 

– Mii bidjat merkii ahte Sámediggi lea sádden rapporta riikkaidgaskasaš orgánaide (EMRIP) sámegiela birra mas čállojuvvo ahte leat ollu sámegielahállit guđet eai oačču rivttiid maidda sis lea vuoigatvuohta, dadjaba soai. – Vaikke vel mediain ain ihtet áššit main dát váttisvuohta boahtá ovdan, de eai boađe fylkkamánnái moaitagat. Sihke áittardan- ja váidalanortnet sámelága giellanjuolggadusaid mielde berre nannejuvvot, oaivvilda Trond Are Anti, ja dan oktavuođas lea maid dehálaš árvvoštallat ahte nanne go áittardeaddji daid vejolašvuođaid mat juohkehaččas leat váidalit.

– Ovttaskas olbmot sáhttet vásihit ahte go sámelága giellanjuolggadusat eai čuvvojuvvo de lea váidaleamis stuorát mearkkašupmi jus boahtá čuovvoleapmi ja diehtojuohkkin sámegiela áittardeaddjis, dadjá Silje Karine Muotka. – Maiddái gielddat mat gullet sámegiela hálddašanguvlui ja iešguđetge stáhtalaš orgánat sáhtášit oažžut eanet bagadallamiid sámelága njuolggadusaid mielde dákkár áittardeaddjiortnegiin, oaivvildeaba dát guokte NSR sámediggeáirasa.

----------

På norsk / darogilli