Leai stuorra eahpesihkkarvuohta das ahte oažžu go Sámediggi meannudit láhkaproposišuvnna 70L; láhkaevttohusas gártet stuorra váikkuhusat riddoássiide miehtá Sámi. Ášši ii lean áššelisttus, muhto NSR fitnii gáibidit oktasaš cealkámuša mii čielggada maid Sámediggi oaivvilda áššis.

Mii leat ilus go NSR fitnii doarjaga oktasaš cealkámuššii riddoássiid vuoigatvuođain. Sámedikke posišuvdna fihttii viimmat loahpas ahte Sámediggi oažžu garrasat mándáhta go hállo ovttain, čielga jienain Stuorradikke ektui, dadjá Geir Tommy Pedersen, guolástuspolitihkálaš ovddasteaddji NSR:as.

– Stuorradiggi dárbbaša oažžut čielga rávvagiid Sámedikkis ahte historjjálaš vuoigatvuođaid galget dohkkehuvvot lágalaččat, joatká Pedersen.

Dát lea čielga signála NSR:ii ahte Sámedikki mielas ráđđehusa láhkaproposišuvdna Riddoguolástanlávdegotti árvalusa maŋŋá lea menddo heittot. – Ráđđehus iská dahkat riddogátti olbmuid vuoigtavuođaid haga, go biehttalit historjjálaš guolástanrievtti sidjiide geat asset vuotnagáttiin, dadjá Pedersen. – Ráđđehus lea čájehan ahte sii eai dohkket historjjálaš guolastusvuoigatvuođaid Finnmárkui eaige eará vuonaide mearragáttis, ja danin fertet mii bargat garrasit oažžundihte dohkkehuvvot dáid go de proposišuvdna galgá šaddat láhkan Stuorradikkis, loahpaha Pedersen. 

----------

På norsk / darogillii