- Mii oaivvildat ahte kulturmuitohálddašeapmi ferte guorahallojuvvot, dadjá Rolf Johansen, sámediggeáirras Ivggus eret. - NSR oaidná dehálažžan ahte sámi kulturmuittut lea suddjejuvvon nu oanehis áiggi maŋŋá go 100 jagi.  Sámi kultuvra ii leat guođđán nu stuorra luottaid lundui ja servodahkii, ja galgá váldit vara dan veaháš mii gávdno.  Muhto boahtteáiggis lea hástalus, dadjá Rolf, ja čilge: - Jus otná njuolggadusat, mas buot mii lea sámi ja badjel 100 jagi automáhtalaččat suddjejuvvo, maiddá doibmet boahtteáiggis, de sáhttit mii ovdamearkka dihte oažžut stuorra hástalusaid ođđaáiggi eanandoalureaidduid ja skohteriid ektui.  - Danne fertet mii oažžut čielggadeami njuolggadusain dan ektui ahte maid hálidat suddjet, dadjá son.

Nubbi poeŋga lea ahte otná ortnegis lea ovttaskas olbmuin ovddasvástádus ruhtadit kulturmuittuid iskkademiid ja registreremiid huksenprošeavttaid oktavuođas. - Dát lea máksinprinsihppa mii duohtavuođas mearkkaša ahte oktasaš kulturárbi máksojuvvo olbmuid priváhta burssas, čilge Johansen. NSR ballá ahte dát áiggi mielde sáhttá heajosmahttit dehálaš kulturmuittuid registrerema ja áimmahuššama. - Lea go álbmot ovttaoaivilis dáinna ortnegiin, vai sáhttá go nu geavvat ahte olbmot válljejit ahte eai atte dieđuid suddjejuvvon kulturmuittuid birra go dat dagaha váttisvuođaid, ja njulgestaga olggosgoluid guovlluid, visttiid ja dávviriid geavaheami hárrái, imaštallá Rolf Johansen.

NSR buktá dán ođđa áššin Sámedikki dievasčoahkkimii dán vahku, ja sávvá ahte Sámediggeráđđi čuovvolahttá dan ja gieđahallá dan albma láhkái. 

----------

Norsk versjon /Dárugillii