Lei stuora lávki ovddasguvlui sámi gillii go riektelágádus Sis-Finnmárku diggegoddi ásahuvvui, čilge Keskitalo. – Dál lea vejolaš gulahallat diggegottiin sihke sámegillii ja dárogillii, riekteráđđádallamat dulkojuvvojit, ja muhtin háviid leat áššit vuddjojuvvon dušše sámegillii go sihke duopmár, mielduopmárat, áktorat, advokáhtat ja vihttánat ja eará berošteaddjit leat sámegielagat. – Dat nanne riektesihkkarvuođa sidjiide geasa guoskka ášši go sii sáhttet atnit iežaset giela go leat riektelágádusain gulahallamii, dat lea diehttelas, dadjá son.

Maiddái politiija- ja leansmánneossodat lea geatnegáhtton giellalága mielde go sii barget siskobealde sámi giellahálddašanguovllus. Keskitalo lea bidjan merkii ahte virgealmmuhusat čájehit ahte sámegiella lea dušše lassigelbbolašvuohta, iige leat mearkašahtti gelbbolašvuohta dahje gáibádus jus áigu bargat guovlluin gos stuora oassin álbmogis leat sámegielagat. – Maid bargá ossodat sihkkarastindihte ahte sii oččodit ja váldet vára dan gelbbolašvuođa maid sii dárbbašit vai bearráigehččet sámiid riektesihkkarvuođa, jearrá son. – Lea vuorjašahtti jus ossodat ii beroš eanet sihkkarastindihtte buori gulahallama dainna servvodagain maid sii leat bidjon bálvalit.

NSRa jođiheaddji vásiha ahte lea unnan ipmárdus ahte giella- ja kulturipmárdus lea dehálaš máhttu politiijaossodagas. – NSR evttoha ahte Sámediggi váldá oktavuođa justisministáriin ja Politiijadirektoráhtain digaštallandihte movt sáhttá buoridit riektesihkkárvuođa sámi álbmogii ja ovttaskas sápmelažžii mas lea oktavuohta politiijain ja riektevuogádagain, loahpaha Aili Keskitalo.

----------------

På norsk/Dárogillii