Sámedikkeájrras Miriam Paulsena mielas le ájnas ahte vuorrasa institusjåvnåjn bessi gielasa adnet. Sån dal vuojnná dát vejulasjvuohta le nievredum Divtasvuona suohkanin.

 - Divtasvuona suohkan le 2012-budsjehta tjadá gádodam giellabarggevirgev Divtasvuona skibáj- ja boarrásijvieson. - Institusjåvnå årroj ij la desti visses ja fássta giellaressurssa mav máhtti viehkken adnet, javllá sån. Miriam Paulsen le iesj Divtasvuonas ja sujna l skihppijsujtáråhpadus.

- Vuorrasa buoremus láhkáj iellemijt mujtti ja viessu gå bessi iednegielasa adnet. Danen vierttiji bargge guládallat ja aktan barggat sámegiela- ja kultuvra premissaj vuodon, tjielggi sån. – Vuorrasa li viessomájgen luondulasj ja hiebalasj gielav válljim, javllá Miriam, ja joarkká: -  Máhttelisvuohta birrasij gulládallat ietjas giellaj iellema låhpadimen le ájnas soapptsoma hárráj ja le dan láhkáj aj tjielgga oasse vuorodimes mij galggá bærrájgæhttjat vuorrasij vejulasjvuodajt buoremus dievnastusájt oadtjot, tjielggi sån. - Dáfon gånnå stuorra oasse vuorrasijs le sámegiella iednegiellan lej giellavirgge ájnas doajmma ja muhtem mærráj ållidibme dakkir vuorodimes. Virgge le dal gádoduvvam, ja sámegielak vuorrasa Divtasvuona skibáj –ja boarrásijvieson li massám tjårggidusáv dan jasskavuohtaj mij guládallam iednegiellaj buktá. 

- Ij bierri liehket dárbbo mujttádahttet Divtasvuona suohkan le oassen sámegiela háldadimguovlos ja le Sámelága baktu hihkalam sierra åvdåsvásstádusáv sámegielav åvddånahttet ja várjjalit. §3-5 milta le ulmutjijn vijdedum riektá sámegielav varresvuoda- ja sosiálsuorggen adnet: “Sujna gænna le miella sámegielav adnet gå le gåtsedime ietjas berustimijt bájkálasj ja guovlo almulasj varresvuoda- ja sosiálainstitusjåvnåj gáktuj háldadimguovlon, le rievtesvuohta dievnastusáv oadtjot sámegiellaj”.

- Mij NSRan gåhttjop danen sámedikkerádev guládallat Divtasvuona suohkanijn vaj guovtegielakvuohta suohkana boarrásijinsititusjåvnåj bærrájgåhtseduvvá.

------------

På norsk/Dárogillii