Sámediggi meannudii duorastaga 2012 bušeahtta. NSR evttohii 5 millijovnna sihkkarastindihtte- mearrasámi vuoigatvuođa. Bb ja Árja eaba čájehan politihkalaš áigumuša geiget gieđaid min álbmogii rittus ja jienastedje vuosttá evttohusa bušeahttameannudeamis Sámediggis duorastaga.

Ii sáhtte várra vuordit eanet Egil Ollis ja sáme-Bb geat nu ollu háviid láhttejit nugo ráđđehusa veagat, muhto mii leat erenoamáš behtohallan Árja bealis geat lohpidedje jienasteddjiide vuoruhit mearrasámiid, dadjá Ann-Mari Thomassen, NSRa bušeahttahovdejeaddji. – Dán oktavuođas orui dego sii eanet beroštedje iežaset sierraprošeavttain go dan ahte čohkket Sámedikki nugo ulbmilaš bargu sihkkarastindihtte min álbmoga vuoigatvuođaid.

NSR háliida mearrasámiid vuoigatvuođaid čielggadeami, ja oaivvilda ahte Sámediggi ferte áŋgiruššat dál! Badjel 40 jagi lea NSR nugo organisašuvdnan bargan sihkkarastindihte mearrasámiid boahtteáiggi. Bargu doalvvui min riddoguolástuslávdegotti evttohussii. Seamma áigodagas leat eiseválddit fievrredan politihkka mii lea mielddisbuktán eretfárrema rittus, masá ollislaš struktureren guolastansuvddu ja de leat čohkken vuoigatvuođaid stuorakapitála gieđaid gaskkii.

Ruđat galget geavahuvvot alliansehuksemii riekte-eaiggádeddjiide, čielggadeapmi dasa geat galget cegget riektegáibádusa ja juridihkalaš, ekonomalaš ja praktihkalaš veahki dassážii leat geahččalan daid rievttalaš vejolašvuođaid mat gávdnojit, čilge NSR-jođiheaddji Aili Keskitalo.

Evttohusa duogáš lea čuovvoleapmi Riddoguolástuslávdegotti cealkámušas. Geassemánus 2011 mearridii Bargiidbellodat ovttas ovttasbargoguimmiiguin Sámedikkis šiehtadusa ráđđehusain mii sisttisdoalai lohpádusaid ahte oččo lassi 3000 tonna dorski-eriid ja heiveheapmi Mearraressuršaláhkii. NSR háliidii Riddoguolástuslávdegotti evttohusa mas lei dohkkeheapmi dain historjjálaš vuoigatvuođaide guolásteapmái ja jienasteimmet hálbbes šiehtadusa vuosttá.

Vuoi beassat vuoruhit Borjjadaga leat mii NSRas vuoruhan čavgadit iežamet bušeahttaevttohusas. Máŋgá buori doaimmat fertejit boahtte jáhkkái maŋiduvvot. - Min árvvoštallama mielde sáhttet muhtin eaŋkiláššit vuordit ovtta dahje guokte jagi go mearrasápmeláččat leat ferten vuordit 40 jagi, loahpaha Ann-Mari Thomassen. – Dađibahabut eat dán háve oččon Bargiidbellodaga eatge Árjja mielde dasa.

Oktavuođadieđut:

Aili Keskitalo , 97129235, NSRa parlamentáralaš jođiheaddji

Ann-Mari Thomassen, 900 57123, miellahttun Plána ja finánsalávdegottis 

----------

På norsk / Dárogillii