Lea hirbmat vuorjašuhti go doarjagat boazodoalu fágareiveortnet mii dássážii lea ruhtaduvvon Boazodoalu ovddidanfoandda bokte evttohuvvo eretbidjot dán jagaš boazodoalušiehtadallamiin, dadjá sámedikkeáirras Silje Karine Muotka Norgga Sámiid Riikasearvvis (NSR). – Eret bidjat fágareivve ruhtadeami ovdalgo eará ruhtadeapmi lea sihkkarastojuvvon ovddasta stuora eahpesihkkarvuođa ortnega birra mii sihke rekruttere ja formalisere fágagelbbolašvuođa boazodoalus, deattuha Muotka.

Fidnooahppiortnet lea guovddáš ortnet sihkkarastit ahte boahttevaš boazodolliin lea buorre ja nanu fágagelbbolašvuohta boazodoalofágas. Ortnet lea maid doaibman dego nanu vuođđu siddjiide geat háliidit joatkit iešguđetge oahpuide. – Lea dehálaš ahte dakkár máhttu boazodoalus ja boazodoalu birra lea čanastuvvon iešguđetge dilalašvuođaide, dadjá Muotka.

Otne leat birrasiid 30 nuorat geat leat mielde ortnegis. Lea maiddái nu ahte Sámi joatkkaskuvla ja boazodoaloskuvla Guovdageainnus rekruttere ohppiid geat háliidit váldit fágareive boazodoalus. – Eretbidjat ortnega šaddá maid čuohcat máhttobirrasiid boazodoaloskuvllas dainna lágiin ahte nuorat eai duostá váldit fágareivve boazodoalus, oaivvilda Muotka.

Sámedikkeráđi evttohusat boazodoalošiehtadussii 2012-2013 čujuhuvvo ahte fylkasuohkanat sáhttet leat ruhtadangáldut ortnegii, muhto eahpesihkkarvuohta dán birra sáhttá leat hui negatiivvalaš oahppo-ohcci nuoraide. Gažaldagat ortnega ruhtadeami birra sáhttá mielddisbuktit ahte nuorat eai duostá formaliseret iežaset boazodoalomáhtu fágareivve bokte – ja dat lea stuora lávki maŋošguvlui muđui buori ovdáneamis.

Dál ferte Sámediggi sihkkarastit ahte fágareiveortnet ii hedjon ruhtaeahpesihkkarvuođa geažil. Lea dehálaš ovddasvástádus maid mun vuorddan čuovvoluvvo Sámedikkis, guovddaš eiseválddiin ja ealáhusorganisašuvnnain, loahpaha Silje Karine Muotka, gii maiddái jođiha Sámedikki bajásšaddan-, fuolahus- ja oahppolávdegotti.

Gulahallandieđut:

Sámedikkeáirras Silje Karine Muotka: tlf. 984 87 576

--------------------

På norsk / Dárogillii