Mun šallošan sakká go eanetlohku ođđa gávpotráđđi Romssa bijai ovdán ahte háliidit geassadit ohccamušas beassat sámegiela hálddašanguovlui, dadja Norgga Sámiid Riikasearvvi (NSR) jođiheaddji Aili Keskitalo. – Lea garra signála mii dađibahabut sahtta dulkojuvvot ahte dát gávpotráđđi ii hálit máidege dahkkat sámi álbmoga ovddas Romssas, dadja Keskitalo.

Leat leamaš olu digaštallamat Romssa suohkanis dán ášši oktavuođas, ja lea olggosbuktan hui heajos gova sámiid birra.

Dakkár mearrádus ii oro heiveme gávpoga ieža identitehtii mii lea ođđaáigasaš máŋggakultuvrralaš gávpot, oaivvilda Keskitalo ja cuiggoda ahte Romssa lea čájehan sámivuođa dan oktavuođas go ohce OG gilvvuide ja stuorit prestišadoaluid vuolde nugo Mandela-konsearta 2005as.

Maiddái universitehtagávpot Romssa lea okta peaŋga dán oktavuođas.

- Romssa suohkan lea guossoheaddjisuohkan álgoálbmotuniversitehtai Romssas, ja mearrádus geassadit ohccamušas beassat sámegiela hálddašanguovlui ii veahket universitehta posišuvnna nannemis.

- Mii maiddái oaidnit ahte FRAM-guovddaš lea vuoruhuvvon ja dán oktavuođas ásahit Artálaš ráđi čállingotti Romssii, dadja Kesktialo viidaseabbo – Sámi Romssa šadda duššin go eai duosta radikála lávkkiid váldit, oaivvilda Keskitalo.

Romssas lea sámi idenditehta, ja dán berrešii suohkan vuhtiváldit, oaivvilda Keskitalo. – Mu mielas berre ođđa suohkanstivra čájehit gierdevašvuođa ja jierbmaivuođa iežaset čoahkkimis skábmamánu 9.beaivve, loahpaha NSRa jođiheaddji Aili Keskitalo.

-----------

På norsk / Dárogillii