Nuoraidkonferánsii vulget NSR nuoraidlávdegotti láhttut, daid gaskkas Saia Stueng, gii illuda deaivvadit eará sámi nuoraiguin ja digaštallat. Konferánsa lea goalmmadin dakkár oktasaš sámi nuoraidkonferánsain. Namman lei ovdal Sámi parlamentárlaš Ráđi nuoraidkonferánsa- SPR-N, go lágiduvvoje SPRa parlamentáralaškonferánsaid oktavuođas. Cealkamušat nuoraidkonferánsas ovdánbuktejuvvojit sámdikkiide ja ruošša áirasiidda.

Ovdal lea SPR-N lágiduvvon Likšus Ruoŧa bealde, ja Honnesvágis Norgga beale. Lea illudahtti go dán jagi lea konferánsa suomabealde Sámis. Dán jagi lea suoma nuoraidráđis ovddasvástadus organiseremis konferánsa, muhto sihke SUPU ja ruoŧa nuoraidráđđi leat mielde plánemis.

NSR-N jođiheaddji, Saia Stueng, oassalastta konferánsas ja oaidna áŋgirvuođain áššiid mat galget gieđahallot. - Ovttasbargu rájaid badjel lea dehalaš, erenoamaš dehalaš lea láhčit oktasaš deaivvadanbáikkiid sámi nuoraide olles Sámis, muitala Stueng. Son sávva áššit buktet beroštumi ja ahte šaddet ollu digaštallamat. Saia Stueng sávva oaidnit ollu nuoraid olles Sámis Suoločielggis gaskamuttos golggotmánus.

Jus juste DON háliidat deaivat nuoraid miehta Sámi ja searvat konferánsii, de manat Sámedikki siidduis ja dieđihat iežas dáppe.

-------------

På norsk / Dárogillii