Priváhta berošteaddjit ovddasvástadus?

-Ollu Sámi mánáidgárddit leat priváhta go almmolaš eiseválddit eai leat vuoruhan sámi mánáidgárddiid. Priváhta berošteaddjit leat ásahan priváhta sámi mánáidgárddiid go leat oaidnán dan árvvu ja dan dehálaš barggu maid Sámi mánáidgárddit dahket sámi mánáid bajásgeassimis, sámegiela ja –kultuvrra ektui, dadjá sámedikkeáirras Trond Are Anti. Danin evttohii NSR- ja NSR/SáB sámediggejoavku “sihkkarastit priváhta sámi mánáidgárddiid fálaldagaid” ođđa áššin

Oažžut uhcimusat 91%

Anti čujuha ahte Borgemánu 1. b. 2011 rájes galget priváhta mánáidgárddit oažžut uhcimusat 91% maid sullasaš gielddalaš mánáidgárddit ožžot doarjagiin. Dasa lassin sáhttet sámi mánáidgárddit ohcat sierra doarjaga Sámedikkis. Doarjaga ulbmil lea sihkkarastit sámi mánáide mánáidgárdefálaldaga mii lea vuođđuduvvon sámegillii ja kultuvrii. Sámediggi máksá juolludan doarjagiid gieldda hálddahusa bokte priváhta mánáidgárddiide.

Anti muitá go giđđat 2011 áitojuvvojedje guokte priváhta sámi mánáidgárddit Deanus, mat leat áidna sámi mánáidgárddit Deanus, loahpahit fálaldaga ekonomalaš sivaid geažil. – Lihkkus čájehuvvui ahte eai lean ožžon ollislaš doarjaga maid galge oažžut, muitala Anti.

Guorahallat juolluduvvon ruđai

Lea  dárbu guorahallat ožžot go priváhta sámi mánáidgárddit juolluduvvon Sámedikki doarjagiid áiggil ja leago lea go dát doarjja lassin dan 91% doarjagiid maid gielddat mákset priváhta sámi mánáidgárddiide. – Lea maid dárbu iskat ahte gielddat meannudit priváhta mánáidgárddiid dásseárvosaččat ekonomalaččat go gieldda mánáidgárddiid. Eará ášši lea oažžut čielggasin ahte rehkenastet go gielddat buot goluid mánáidgárddis dan 91% numo viessogolut el-rávdnji, viessohoaiddárbálvalusat, bassigolut jna., dadjá Anti.

Anti oaivvilda ahte Sámedikkis lea erenoamáš ovddasvástádus sihkkarastit sámi mánáidgárddiid. Sámi mánáidgárddit leat dehálaš ásahusat mat sihkkarastet, ovddidit ja seailluhit sámegiela ja –kultuvra, loahpaha Anti.

Gulahallanolmmoš: Nuortaguovllu válgabiire NSR/SáB sámediggeáirras Trond Are Anti, mob.nr. 45517781

---------

På norsk / Dárogillii