Stivračoahkkimis geassemánu 21.-22.beaivvi lea Davvi-Dearvvašvuohta mearridan bargagoahtit sámi dearvvašvuođapárka ásahit Kárášohkii. Párka galga vejolašdahkat ovttasajaldeami Sámi erenoamašgelbbolašguovddaža ja SANKSa (Sámi našunála máhttoguovddáš-psykalaš healsu), ja dainna lágin čohkket stuora oasi dearvvašvuođafágalaš máhtu Kárášohkii seamma robi vuollái. Boahttevaš oahpahus ja máhttolašguovddáš bissovaš buhcciide sáhtta šaddat oassin dán birrasis.

-NSR lea hirbmat ilus go Davvi-Dearvvašvuohta čielgasit háliida stuora investeremiid bidjat sámi dearvvašvuhtii, dadja Aili Keskitalo, NSRa jođiheaddji. – Dakkár ovttasajaldeapmi vejolašdahkka stuorat ovttasbarggu gaskal somátalaš ja psykiatrija surggiid. Mii maid sávvat ahte dát ovttasajaldat fágalaš biras šadda vel eambbo geasuheaddji bargobáiki.

Ovttasajaldeapmii lea Norgga-Dearvvašvuođa ovttasdoaibmanođastusa čuovvoleapmi. NSR lea guhkkid áiggi bargan ovttasdoaibmanođastusain, ja lea ovdal láitan sihke Sámedikki ja Ráđđehusa go mentto unnan leat čuovvolan sámi buhcciid dárbbuid.

-Viimmat doaibma mii nanne sámi fágabirrasiid, ja de maiddái sámi buhcciid, dadja Silje Muotka (NSR), Sámedikki bajášaddan-, fuolahus-, ja oahppolávdegotti jođiheaddji. – Mii vuordit ahte dát bargu maiddái johtta organisatoralaš ovttasdoaibman guvlui. Dát soaittá leahket álgu sámi dearvvašvuođadoibmii maid guhká leat ohcalan.

NSR gieđahalai ovddit riikačoahkkimis sámi dearvvašvuođa- ja čálgupolitihkka prográmma http://www.nsr.no/website.aspx?displayid=47979

NSRa gulaskuddancealkamuš Ovttasdoaibmanođastusa birra gávdno dáppe http://www.nsr.no/website.aspx?displayid=47991

-------

På norsk / Dárogillii