Norgga Sámiid Riikasearvi (NSR) hilgu Sámedikkeráđi Riddoguolastuslávdegotti evttohusa. Ášši lea meannuduvvon Sámedikki Ealáhus- ja kulturlávdegottis dán váhkku.

-                Gudnijahttin máttarváhnemiid dihti, dálá áiggi ektui ja boahtteáiggi buolvvaid dihti eat sáhte doarjut šiehtadusa mii ii leat áŋkorasttojuvvon min oktasaš, historjjálaš riektái guolastit, dadja Geir Tommy Pedersen, NSRa áššejođiheaddji.

Riddoguolastuslávdegoddi, maid Carsten Smitha jođihii, evttohii guovvamánu 2008is ođđa lága mii dohkkeha sámiid ja riddoálbmoga rievtti guolleriggodagaide, sihkarastit báikkalaš váikkuheami guolastushálddahussii, ja evttohii ortnega mas leat nuvttaearit. Máŋŋa ráđđadallamiid gaskkal Guolastus- ja Riddodepartameantta lea unnan báhcan evttohusas.

Lea sállošahtti ahte ollu buorit evttohusat maid Riddoguolastuslávdegoddi buvtti leat bálkestuvvon proseassas, dadja Pederen. Kompromissa ii mohkege sihkarastte mearrasápmelaččaid historjjalaš rivttiid guolastit.

Ii šatta Finnmárkkuguolastusláhka dahje guovllu hálddašeapmi guolleriggodagaide ja iige sihkarastte eriid riddoálbmogii. Dat mielddisbukta oanehažžot dadjon ahte ii diksu ge leat sihkkarastton boahtteáigai.

Departameantta lea hilgon ahte leat historjjalaš rievtit guolastit, ja ii hálit addit eará go ráđđeaddi válddi vuonaguolastuslávdegoddái.

NSR oaivvilda ahte Sámediggi ii sáhte dohkkehit dán šiehtadusa. Ii leat ovttaoaivilvuohta dan historjjalaš riektái ja dan sámi ja báikkalaš váikkuheapmái hálddašeamis.

Mii šállosit ahte Ráđđehus hilgu Riddoguolastuslávdegotti vuđđolaš dokumentašuvnna ja buori evttohusa, loahpaha Geir Tommy Pedersen. NSR ii dohkket ahte Sámediggi šiehtadalla eret mearrasámiid rivttiid, ja háliida ášši geahččalit álbmotrievttis.

--------------

Geir Tommy Pedersen, tlf. 915 43 995

På norsk / Dárogillii