Ovttasdoaibmanođastus ii sihkaraste sámi geavahedjiide ovttadássašas dearvvašvuođa fálaldaga mii lea doarvái buorre, ja dan šallošan sakka, dadja Silje Karine Muotka Norgga Sámiid Riikasearvvis gii maiddái jođiha Sámedikki bajásšaddan- fuolahus ja oahppolávdegotti.

-In leat veahašge duhtavaš daid bohtosiiguin maid Sámedikki šiehtadallamat ovttasdoaibmanođastusa birra leat buktan. – Lea leamaš beahtalahti ahte ráđđehus ii leat háliidan sihkarastit sámi geavahedjiide bures nohka láhkaevttohusas mii dál galgá meannuduvvot Stuoradikkis, oaivvilda Muotka gii ieš lea oassálastan daid politihkkalaš šiehtadallamiiguin maid Sámediggi lea čađahan.

Min mihttu lei sihkarastit ovttasdoaibmanođastusa ovdáneami viidasit otná dearvvašvuođabálvalusa mihttu ektui mii lea oččodit sámi geavaheddjiide dásseárvvosaš dearvvašvuođafálaldaga. Dat mearkaša ahte easttadan dearvvašvuođabarggus ja plánemis ja láhčimis dearvvašvuođabálvalusain maiddái jurddašit sámi álbmoga birra, dadja Muotka

Ráđđehus ovdánbuvtti evttohusa ahte láhkačállosis galgá čielgasit oidnot ahte suohkanat mat leat siskobealde sámi giellahálddašanguovllus galget vuhtii váldit sámi álbmoga plánenbarggus mii guoska dearvvašvuođabálvalusaide suohkanin. Sápmelaččat geat orrot olggobealde sámi giellahálddašanguovllu maiddái galget oaččut dásseárvvosaš ja heivehuvvon dearvvašvuođafálaldaga ja dat ii leat dađibahabut čielggas láhkaevttohusas mii dál lea, dadja Muotka.

Dán duogažiin Norgga Sámiid Riikasearvi oassálasta stuoradikkegulasteamis maid sámedikkeráđđi lea dáhtton dearvvašvuođa- ja fuolahuslávdegottiin Stuoradikkis 10.b miessemánus, dadja Muotka. –Dán dehalaš áššis lea ovdamunni jus Sámediggi lea čoahkis. Lea min oktasaš hástalus oaččut stuoradikkelávdegotti ipmirdit ahte sápmelaččaid ii sáhte gieđahallat dego sierraberošteaddji joavkun, muhto sápmelaččat- dego iežá álbmot gáibidit dearvvašvuođabálvalusaid gos beassat iežamet giela geavahit ja dusttejuvvot kulturipmárdusa vuođul, loahpaha Muotka.

 -------------

Dárogillii / På norsk