IBSS lea vásihan aktiválaš vássan jagi, dan čájeha jahkedieđahus gos leat badjel 40 meannuduvvon stivraášši. Erenoamažiid lea heaittiduvvon joatkaskuvla Skánihiin ožžon olu mearkašumi, ja ođđasit válljejuvvon jođiheaddji Thomassen lohpida ahte IBSS ain galgá aktivalaččat bargat oaččundihte skuvla čuožžilit. – Oahppit geat lohket sámegiela eará joatkaskuvllain mat leat dán guovllus eret lea njiedjan, dadja Thomassen, ja oaivvilda ahte dat čájeha čielgasit ahte skuvla lea dehalaš nannendihte ja ovddidandihte báikkalaš sámegiela ja kultuvrra.

IBSS lea áŋgirit bargan oidnosindahkat sámivuođa dán guovllus gos lea guhkes ja čielga sámi historjá. – Sámi geaidnogalbbat gos báikenamat leat čielgasit ja álkit vuohki oidnosindahkat ahte dáppe leat vaikko man guhka gávdnon ja ain gávdno sámi kultuvra ja historjá mii lea iežálagan eanetloguálbmogis. – Manne ádjanan oažžut áddejumi dáid áššiid birra, imaštalla Thomassen, ja seammas gávnnaha ahte IBSS ii goassige jurddaš vuollanit geaidnogalbba ja báikenama áššiid.

IBSS lea eará go dáid guokte stuora áššiiguin bargan oassalastan našunala konferánsain, reivviid čállan báikkalaš suohkaniida sámi guoski áššiid birra, doaimmahan kurššaid NSRa rávisolbmuidoahpahusa bokte SOL, ja álggahan mánáid- ja nuoraidprošeavtta duoji ja giela birra maid NSR lea ruhtadan.

IBSS ii áiggo láikohallan 2011 ge, lohpida movttegis ođđasitváljjen jođiheaddji. – viidasit fievrredit min buori bargodábiid maid IBSS 2010 lea dahkan šadda dehalas, ja 2011 mii áiguit ráhkadit ođđa deaivvadanbáikit sámegiela ja kultuvrra váste. – Vaikko kultuvra lea ollusiida eallime beaivvalaččat, de háliida IBSS 2011s álggahit prošeavtta gos kultuvra ja giella oačču saji somas ja gelddolaš doaimmaid bokte, sihkte searvvi miellahtuide ja eará berošdedjiide. – Mii háliidit váldit eanet atnui meahci searvebarggus, ja mii lea suohtaseabbo go deaivvadallat sihke dološ ja ođđa oahppasiiguin jieŋka nalde “sparkedettiin” dahje go sámi vuogi mielde ávkkastallat luonddu, jearra Thomassen.

Thomassen oačču dáid olbmuid mielde stivrii: Tove Kvernmo Gaup, Ann Jørgunn Larsen-Sara, June Gerd Johnsen ja Per Henrik Muotka. Várremiellahtut stivrii leat váljjejuvvon: Nanna Thomassen, Tore Johnsen ja Kjell Thore Karlsen. Thomassen lea duhtavaš olbmuiguin geat leat vuolgán stivrii, ja illuda bargagoahtit siiguin. – Lea seaguhus sihke eallilan ja ođđa olbmot ja rehkenastan ahte dat adda searvái sihke ođđa vuoimmi ja deattu vuhtiváldit daid dehalaš áššiid, loahpaha Thomassen.

---------------

På norsk / Dárogillii