Davvi- Hålogalandda bismma háliida Sámediggái addit eambbo ovddasvástadusa sámi girkoeallima badjel. Juo, giito, dajan mun. Son maiddái háliida ruhtajuolludeapmi galga mannat Sámedikkii čađa. Juo, giitu, lean ovttaoaivilis. Lea oassi sámi iešmearrideamis ahte ieš mearridit sámi servvodaga badjel, ja dalle maiddái sámi girkoeallima.

Muhto leago dakkár ortnet buorre sámi girkoeallimiii? Ii leat, dađibahabut, ii goit ruđalaččat. Mis leat juo máŋga ovdamearkat sámi institušuvnnaid birra, gos ovddasvástadus lea sirdojuvvon Sámediggái, ja maŋitáigai ii leat oččon seamma ovdaneami go seammaláganaš institušuvnnat stádabušeahta vuolde. Čalmmus ovdamearka lea Beaivvaš Sámi Teather. Lea dađibahabut nu ahte barggut ja institušuvnnat sirdojuvvojit Sámediggai ruđaid haga. Dát ovdáneapmi oaivvilidit mii Norgga Sámiid Riikasearvvis (NSR) lea balddahahtii.

In jáhke šadda earálágan sámi girkoeallimiinge. Norgga girkkus leat buorit ovdánahttinjurdagat sámi girkoeallima hárrai, go Girkočoahkkin meannudii easkabáliid strategalaš plána sámi girkoeallimii. Mun jáhkan, oaččundihte ruđaid buot doaimmaide, de lea buoremus ahte ruhtadoarjja boahte njuolga stádabušeahtas, iige Sámedikki bokte. Iešmearrideapmi ja ekonomiija leaba gittalaga, go ii sáhte ovdánahttit servvodaga jus eai leat doarjagat mat ovdanahttejit.

Ovdalgo sámi girkoeallima ovddasvástadus sirdojuvvo Sámediggái, fertejit leat duohta bušeahttašiehtadallamat ráđđehusa ja Sámedikki gaskal. Dán rádjai ii leat Egil Olli (Bb) ja Sámedikkeráđđi lihkostuvvan dainna. Muhto jus dat šadda duohta, de leat mii NSRas gergosat váldit badjelasas sámi girkoeallima.

---------------

På norsk / dárogillii