NSR árvala Sámedikki 2011 bušeahttaevttohusastis nannet ohcanvuđot doarjaga mariidna ealáhusaide 1 milliuvnna ruvnnuin, ja seammás rahpat Sámedikki vejolašvuođa juolludit fievrridandoarjaga.

Ovdal leamaš čatnon eahpesihkkarvuohta guolevuovdimii Davvi Romssas ja Finnmárkkus. NSR oaivvilda fievrridandoarjja sáhtášii ávkin dasa. – Fievrridandoarjja lea doarjja fievrridit guoli vuostáiváldinstašuvnnas guoledoaimmahahkii, lohká Geir Tommy Pedersen. – Ovdamearkka dihte sáhtášedje Ivguvuona guolásteaddjit oažžut doarjaga fievrridit guoli Skiervvá guoledoaimmahahkii.

Sámediggi gieđahallá 2011 bušeahttaevttohusa Sámedikki lávdegottiin. – Mii doaivut Sámedikki eanetlohku oaidná otná dilis leat menddo stuorra eahpesihkkarvuođat guolevuostáiválddiide ja báikkálaš guolásteddjiide, ja ahte dorjjošedje dán ođđa-áŋgiruššama, lasiha Pedersen.

----------

På norsk / darogillii